Бұл туралы Мемлекет басшысы Қасым-Жомарт Тоқаев Бүкілармиялық кеңес отырысы барысында айтты. Президенттің айтуынша, күштік құрылымдар жаңа талапқа сай болуы қажет.
Соңғы деректерге сәйкес, Қазақстан аумағында 237 соғыс ардагері тұрады.
Ал Түркістан облысы бойынша Ұлы Отан соғысына 140 мыңнан астам азамат аттанып, оның 70 мыңы елге оралған. 2023 жылдың 25 сәуірдегі жағдайымен Түркістан облысында ҰОС ардагерлері және оған теңестірілгендер есебінде 4438 адам болса, оның ішінде Ұлы Отан соғысы ардагерінің саны – 14 адамды құрайды. Тарихтың куәгері, отаншылдықтың үлгісіне айналған ардагерлерге мемлекет тарапынан әрқашан да қолдау, құрмет көрсетіліп келеді. Ардагерлерге Ұлы Жеңіс мерекесінің құрметіне бір реттік материалдық көмек төлеу үшін аудандық, қалалық бюджет есебінен 175,5 млн. теңге қаржы бөлініп, майдангерлерге берілді.
«Қазір Арнайы операциялар күштерінің қолбасшылығы құрылды. Сондай-ақ десанттық-шабуылдаушы әскердің қарым-қабілетін арттыру үшін нақты жұмыс жүргізіліп жатыр. Аумақтық қорғаныстың әлеуеті күшейтіліп жатыр. Азаматтық қорғаныс бөлімшелері құрылып жатыр. Арнайы жасақ бөлімдерін дамыту ісі тың қарқынмен жалғасуда. Осы жұмыстың бәрін уақтылы аяқтау керек. Олар біртіндеп қажетті жабдықтармен қамтамасыз етілуге тиіс», деді Қ.Тоқаев.
Сондай-ақ Мемлекет басшысы мемлекеттік органдардың тығыз қарым-қатынаста болуы өте маңызды екенін атап өтті.
«Сонда ғана кез келген қауіп-қатерге төтеп бере аламыз. Қуатты армия – тұрақтылық пен тыныштықтың кепілі», деді ел Президенті.
Қазақстанда әскери-патриоттық тәрбие берудің 2030 жылға дейінгі тұжырымдамасын әзірлеу қолға алынады. Мемлекет басшысы – Қазақстан Қарулы Күштерінің Жоғарғы Бас қолбасшысы Қасым-Жомарт Тоқаевтың айтуынша, бүгінде жас қазақстандықтарды отаншылдыққа тәрбиелеу маңызды міндеттердің бірі болып отыр. Осы тұста елдің түпкір-түпкірінде 9 мыңға жуық әскери-патриоттық ұйым ашылған.
«Тағы бір маңызды міндет – жастарды отаншылдыққа тәрбиелеу. Елімізде 9 мыңға жуық әскери-патриоттық ұйым жұмыс істейді. Сол ұйымдардың қатарында 260 мыңнан астам жасөспірім бар. «Жас сарбаз» қозғалысының аясында 400 «Смарт сарбаз» үйірмесі ашылды. Бұл үйірмелерге 6 мыңға жуық жас жеткіншек қатысады», деді Қасым-Жомарт Тоқаев Бүкілармиялық кеңес отырысы барысында.
Бұл ретте Президент Ұлы Отан соғысына қатысқан қазақтың даңқты батыры, әскери қолбасшы әрі талантты жазушы Бауыржан Момышұлының қанатты сөзін негізге алып, өскелең ұрпақтың патриоттық рухын көтеруге назар аудару қажет екенін айтты.
«Өскелең ұрпақтың әскери-патриоттық рухын көтеруге баса мән беру қажет. Бауыржан Момышұлы «Ешкім батыр болып тумайды. Батырлық та мінез секілді, өскен орта, көрген тәрбиеге байланысты қалыптасады» деген. Біз батырларымыздың ерлігін үнемі дәріптеп отыруымыз қажет. Осыған орай әскери-патриоттық тәрбие берудің 2030 жылға дейінгі тұжырымдамасын әзірлеу керек. Сондай-ақ «Жас сарбаз» қозғалысын дамытып, оны ұлттық деңгейге көтерген жөн», деді Мемлекет басшысы.
Сөзін аяқтай келе, Президент қазақ армиясында қызмет ететін әр жауынгер Отан алдында, халық алдында берген антына адал болатынына сенім білдірді.
«Қорғаныс және қауіпсіздік саласы елімізді тұрақты дамыту ісінде айрықша маңызды рөл атқарады. Айбынды армия – қасиетті жерімізді және елімізді қорғайтын сенімді қалқан. Халқымыз алаңсыз өмір сүруі үшін әскери қызметшілер өз міндетін мүлтіксіз атқаруы керек. Мен Отан күзетіндегі әрбір жауынгеріміз антына адал болады деп сенемін», деп түйіндеді Қасым-Жомарт Кемелұлы.
2023 жылы әскери ұшқыштардың жалақысы орташа алғанда 60 пайызға өседі. Сондай-ақ осы саладағы оқытушылар мен дәрігерлердің жалақысы да көбейеді. Бұл туралы Бүкілармиялық кеңес отырысында айтылды.
Отырыс барысында Мемлекет басшысы – Қазақстан Қарулы Күштерінің Жоғарғы Бас қолбасшысы Қасым-Жомарт Тоқаев тағы бір жағымды жаңалықпен бөлісті. Енді мерзімді әскери қызметтегі сарбаздар несиесін төлеу міндетінен уақытша босатылады.
«Әскери қызметте «әлеуметтік лифттің» болуы маңызды. Сол арқылы жастардың қоғамнан өз орнын табуға мүмкіндік беруіміз керек. Қазір осы бағытта нақты жұмыс жасалып жатыр. Әскери борышын өтеп келген азаматтар енді жоғары оқу орнына жеңілдікпен түседі. Мерзімді әскери қызметтегі сарбаздар несиесін төлеу міндетінен уақытша босатылады. Сондай-ақ олар өздері қаласа, армия қатарынан нақты мамандық алып шығады. Жалпы, сарбаздарды әлеуметтік қолдау шараларын мейлінше көбейту қажет», деді Президент.
Мемлекет басшысының айтуынша, әскери қызметшілерге жақсы жалақы төленуі керек. Президенттің айтуынша, ел Үкіметі Күштік құрылымдарға еңбекақы төлеудің бірыңғай жүйесіне көшкен кезде дәл осыны ескеруге тиіс. Сондай-ақ Қазақстанда әскери қызметшілерді зейнетақымен қамту мәселесі де қайта қаралып жатыр.
«Биыл әскери ұшқыштардың жалақысы орташа алғанда 60 пайызға өседі. Осы саладағы оқытушылар мен дәрігерлердің жалақысы да көбейеді. Келесі жылы әскери атақ үшін төленетін айлық ақы 30 пайызға артады. Әскери қызметшілерді зейнетақымен қамту мәселесі де қайта қаралуда. Сержанттарды, офицерлерді әлеуметтік қолдау жұмысы жалғасады. Олар тұрмысына алаңдамай, ел қорғауға сақадай сай болуы керек», деп қосты Қасым-Жомарт Кемелұлы.
