«Qalan.kz» – математиканы қазақ, орыс тілдерінде оқытатын онлайн платформа. Мұнда мектеп оқушылары есептерді жасанды интеллект негізіндегі чат-бот пен мұғалімдердің көмегімен шешеді. Тапсырманы сәтті орындағаны үшін оқушылар ақшалай сыйлық алады. Жобаны қазір бірнеше елде 700 мыңнан астам адам қолданады. Оны құрастырған – мектеп мұғалімі Асқар Болат пен бағдарламашы Қуаныш Нәбиев. Бұл туралы «Егемен Қазақстан» газеті жазды.
– Мектепке жұмысқа барған кезде оқушылардың үнемі бір-бірінен көшіріп жүретінін көрдім. Балалардың көпшілігі пәнді түсінбейді. Ал мұғалімдер әр баланың материалды қаншалықты меңгергеніне мән бермей, жоспармен жұмысын жалғастырады. Сыныптағы 3-4 адам тақырыпты жақсы меңгереді. Қалғаны көшіреді. Ал ҰБТ тапсыруға бір жыл қалғанда олар репетитор жалдап, 5-сыныптан бастап бүкіл оқу бағдарламасын «қуып жетуге» тырысады. Көбі сәтсіз. Өкінішке қарай, мәселе жүйеде болып тұр, – дейді Асқар.
Олар математиканы оқытудың бірегей әдістемесін дайындап, оны жетілдіре түскен. Жобаны дайындауға үш жыл уақыт кетіпті. Барлық есепті өздері жасаған. Әуелде «Qalan.kz» әлеуметтік стартап ретінде іске қосылған. Көп ұзамай Асқардың университеттегі досы Қуаныш Нәбиев жобаға қосылып, бағдарламалау жағын қолға алды. Солай 2018 жылдың күзінде жүзеге асыра бастады. Оқушылар платформаға тіркелмес бұрын өз білім деңгейін анықтау үшін міндетті түрде диагностикадан өтеді. Әрі қарай жүйе оқушының қабілеті мен есептерді шешу жылдамдығын ескеріп, тапсырмаларды автоматты түрде таңдайды.
– Оқушылар арасындағы жүйелі олқылықтарды қалай жоюға болатынын ойлай бастадым. Өйткені балалар әр сабақты 100 пайыз түсінсе екен деп армандайтынмын. Педагогикаға қатысты кітаптарды оқып, мамандардан кеңес алып, түрлі әдіс-тәсілдерді қарастыра бастадым. Мақсатым балаға тақырыпты тез түсінуге көмектесетін жүйе құру болды. Абай Құнанбайұлының өлеңіндегі «Сен де бір кірпіш дүниеге, кетігін тап та, бар қалан» деген жолға назар аудардым. Маған бұл жерде «қалан» деген сөздің мағынасы ұнады. Жалпы, математикада мықты іргетас құру маңызды. Біздің онлайн тренажеріміздің мақсаты – оқушыға математиканың негізін қалау, – деп ниетін білдірді Асқар.
Қосымшада бақылау үшжақты жүреді: мұғалім, оқушы, ата-ана. Қатесі болса немесе қосымша есептері шешілмеген болса, тапсырмаларды орындамай өтіп кету мүмкін емес. Күнделікті есепті шешкен оқушыға «кэшбэк» опциясы арқылы ақшалай сыйлық беріледі. Мысалы, тапсырманы тыңғылықты орындаған оқушылар жалпы сомасы 470 миллион теңгеге жуық табыс тапқан. Таңғаларлық дүние. Ал қолданушыларының күнделікті үй тапсырмасын орындау көрсеткіші 92 пайызға жетіпті. Оқыту жүйесі қарапайымнан күрделіге дейін сан алуан тапсырмадан, алған білімді, материалды бекітуден тұрады.
– Платформаға жасанды интеллект негізіндегі чат-бот, аудиобайланыс пен онлайн тақтаны қостық. Олар бала мен мұғалімнің онлайн қарым-қатынасына қажет. Бот мұғалімдерге хабарламалардың 43 пайызы автоматты түрде жауап беруге көмектеседі. Бұл – біздің команданың жеке жасақтамасы. Айтпақшы, ол қазақша түсінеді. Біз чатқа жауап беру қызметін, қоңырауларды өңдеуді, оқытуды жекелендіруді одан әрі автоматтандыруды жоспарлап отырмыз. Осылайша, AI әрбір оқушының әлсіз тұсын түсініп, жеке дайындық тапсырмаларын жасайды. Бұл оқушыларды көбірек қамтуға және қызмет көрсету сапасын арттыруға мүмкіндік береді, – дейді Қуаныш.
Жанашыр жастар қазір әртүрлі нарықты зерттеумен, кәсіби мамандар тартумен, жаңа өнім әзірлеумен айналысып жатыр. Олар платформаның мобильді қолданба нұсқасын да іске қосты. Қазіргі таңда қолданба 60 мыңнан аса жүктеліп, қолданушылардың бағасн алып жатыр. Сонымен қатар, білім мен ғылымды насихаттау үшін «Әл-Жәбрдің атасы» атты ғылыми-танымдық журнал шығарды. Былтыр«Qalan.kz» Ресей мен Өзбекстан нарығына шықса, биыл Әзірбайжан мен Араб түбегі елдерін бағындырғысы келеді.
