Түркістандық тұрғындардың назарына Qosyl жүйесі жөнінде ақпараттарды ұсынамыз. Қазақстанда жүзеге асқан «Qosyl» платформасының брқатар артықшылықтары бар. Qosyl жүйесін кез келген ұйымның ерекшелігіне бейімдеуге, басқа жүйелермен біріктіруге, жаңа мүмкіндіктерді жетілдіруге болады, яғни бұл артық шектеулердің жоқтығын білдіреді. Сондай-ақ, бұл жүйеде пайдалану уақытының шегі жоқ екенін атап өткен жөн.
Qosyl-дың шетелдік платформалармен салыстырғанда басты ерекшеліктерінің бірі – ақпараттық қауіпсіздіктің жоғары деңгейі.
«Платформа ақпараттық қауіпсіздік талаптарының сынағынан сәтті өтті. Сондай-ақ серверлер Қазақстанда болғандықтан, бірде бір медиа трафик шет ел арқылы өтпейді. Сонымен қатар, отандық жүйені кез келген серверлерге орналастыруға болады. Яғни ол үшін міндетті түрде мамандандырылған жабдық қажет емес, қарапайым серверлік қуаттар да жеткілікті. Екінші мәселе, егер Zoom-мен салыстырсақ, біздің жүйені пайдалану өте оңай және ақпараттық қауіпсіздік тұрғысынан тиімді. Тіпті ақпараттық технологиядан хабары аз адамға оны басқа өнімдермен салыстырғанда пайдалану жеңілірек. Ол қосымшаны жүктеуді қажет етпейді, кез-келген құрылғыдағы браузер арқылы қосылуға болады. Пайдаланушы аты-жөнін енгізеді және тіркелсе жеткілікті. Қаласаңыз, қосымшаны жүктей аласыз. 2023 жылы біз осы бағдарламаны ЦДИАӨМ-де жарты жыл бойы пилоттық режимде іске қосып, пайдаланушылардың сұраныстары бойынша кей тұстарын өзгерттік. Пилоттық нұсқаның қорытындысы бойынша жобаны пайдалануға беру туралы шешім қабылданды», – деп атап өтті Нұрислан Исаков.
2023 жылғы қарашадан бастап Qosyl жүйесі мемлекеттік органдарда пайдалану үшін сәтті іске қосылды және ресми түрде енгізілді. Болашақта осы өнімді білім беру секторында пайдалану үшін бейімдеу жоспарлануда.
