Мемлекет басшысы Қасым-Жомарт Тоқаев еліміздің әлеуметтік-экономикалық дамуы жөніндегі кеңесте мемлекеттер арасындағы өзара сенімсіздік күшейіп, сауда кедергілері артып келе жатқан бүгінгі таңда Қазақстанды да алда қиындықтар күтіп тұрғанын, сондықтан өзіміздің де азаматтардың сұранысын қанағаттандыруға бағытталған нақты нарықтық экономикаға көшуіміз керектігін атап өтті.
«Бүгін әлеуметтік-экономикалық саладағы мақсат-міндеттерді айқындап алуымыз керек. Үкімет және барлық деңгейдегі әкімдер соған сүйеніп жұмыс істейтін болады. Осы басқосуға мәслихаттардың өкілдері қатысып отыр. Бұл да – нақты саяси өзгерістердің нышаны. Атқарушы және өкілді билік арасында тиімді қарым-қатынас орнату өте маңызды. Қажет болса, олар бірін-бірі толықтырып, қолдап отыруы керек. Мұның бәрі мемлекеттік саясатты тиімді жүзеге асыруға мүмкіндік береді. Сондай-ақ, ел мүддесін ескере отырып шешім қабылдауға жол ашады» деді Президент.
ҚР Президентінің бұл сөзін қуана құптаймын және шын жүрегіммен қабылдадым. Ел іші — алтын бесік. Көпшілігіміз ауылда туып-өстік. Енді қалада қызмет етіп жатқан жағдайымыз бар. Елде жағдай тұрақты деп айта алмаймыз. Баға мың құбылады. Халық қымбатшылық құрсауында қалды. Азық-түлік бағасы шарықтап барады. Инфляция еңсе көтертпей тұр. Кеңесте осы көкейтесті мәселені көтерген Қасым-Жомарт Кемелұлы адамдардың айлығының жартысы азық-түлікке кететінін жасырмады. Бұл – ақиқат. Тіпті, айлығын шайлығына жеткізе алмай отырған отбасылар аз емес. Үкімет бұдан былай белсенді әрекетке көшпесе болмайды.
Рас, ауыл халқының табысын арттыратын ілкімді бағдарламалар қолға алынып жатыр. Әсіресе, «Ауыл аманаты» жобасынан күтеріміз көп. Осы мақсатта 100 млрд. теңге бөлініпті. Алайда, «аспаннан шұға жауса да кедейге ұлтарақ та бұйырмайдының» кебі келіп жүрмесін. Сондықтан тиісті орындар тарапынан қаражатқа пәрменді бақылау қажет. Жемқорлықтың жүрмейтін жері жоқ. Мемлекет басшысы субсидияның ақшасына шалқып өмір сүрген кейбір шенеуніктерді де өткір сынға алды. Бұл баршаға сабақ болуы тиіс. Ауылға көрсетілген қазіргі қолдау кейін еселеніп қайтатынына сенімдімін. Ең алдымен ел мүддесі ескерілуі тиіс.
Нұрлан ҚОЗЫБАҚОВ,
Түркістан облыстық мәслихатының депутаты.
