Сайрам ауданында 11 округ бойынша 89 сайлау учаскесі орналасқан. Жалпы сайлаушылар саны 134239 адамды құрайды. Оның ішінде ең көп сайлаушылар Қарабұлақ ауылдық округінде тіркелген. Нақты айтқанда, 15 сайлау учаскесінде – 29640 адам. Барлық сайлау учаскесі өз жұмысын таңғы сағат 07.00-де бастап жүргізуде. Сайлауға келген тұрғындар өз таңдауын жасап, дауыс беруде. Бүгінгі сайлау науқанында учаскелерде партиялық және тәуелсіз бақылаушылар бар.
Қоғам қайраткері Розақұл Халмұрадов Парламент Мәжілісі және мәслихат депутаттарының сайлауына қатысу әрбір қазақстандықтың азаматтық парызы деп санайды.
«Бүгін еліміздің, саялы Сайрамымыздың аспаны шайдай ашық. Күн күлімдеп тұр. Осыған қарап Алла тағаланың назары елімізге түсіп тұр екен-ау деп қуанам. Осындай әсермен ертемен сайлау учаскесіне барып, өз дауысымды бердім», деп атап өтті ол.
Розақұл Халмұрадовтың айтуынша, бүгінде елімізде өзгерісті қаламайтын адам жоқ.
Ауданда екі қарт майдангер бар. Оның бірі Мухаррам Шайхутдинов Ақсукент ауылдық округінде тұрады. Ардагер өз үйінен жәшікке қағазын салды. Ұлы Отан соғысының ардагері, жасы бір ғасырға жеткен майдангер сайлауға қатысып, өз дауысын берді. Алдағы уақытта халық қалаулылары елдің сенімінен шығып, Жаңа Қазақстанды құруға өз үлестерін қосатындарын жеткізді. Қазіргі таңда ардагерден 4 бала, 10 немере, 12-ге жуық шөбере тараған.
Сондай-ақ Қарабұлақ ауылының тұрғыны, Ұлы Отан соғысының ардагері Анартаев Ахмаджан N580 сайлау учаскесіне барып, өз таңдауын жасады. Өз сөзінде елдің болашағынан зор үміт күттіретінін атап өтті. Бүгінгі сайлауға отбасымен барып, даусын беріп, ақ тілегін жеткізді. Қария бүгінде 99 жаста. Жарымен бірге өсірген 9 ұл-қызынан 68 немере, 78 шөбере және 10 шөпшек тараған.
