ТҮРКІСТАН ОБЛЫСЫНДА «TAZA QAZAQSTAN» БАҒДАРЛАМАСЫ АЯСЫНДА БІР КҮНДЕ 20 МЫҢ АҒАШ ЕГІЛДІ

34
Түркістан облысында Қасым-Жомарт Тоқаевтың бастамасымен жүзеге асып жатқан Таза Қазақстан жалпыұлттық экологиялық акциясы өңірдің әлеуметтік дамуы мен экологиялық мәдениетін қатар нығайтуға бағытталған маңызды қозғалысқа айналып отыр. Бұл бастама тек қоршаған ортаны тазарту шарасы ғана емес, қоғамның экологиялық жауапкершілігін арттыратын кең ауқымды әлеуметтік бағдарлама ретінде қарастырылуда.
Мемлекет басшысы Қасым-Жомарт Тоқаевтың «Таза Қазақстан» жалпыұлттық бастамасы аясында Түркістан облысында экологиялық акция ұйымдастырылды. Аталған шара Түлкібас ауданындағы «Ақсу-Жабағылы» мемлекеттік табиғи қорығының 100 жылдығына орай қорық аумағында өтіп, «Taza Qazaqstan» экологиялық акциясы аясында Қазақстан Республикасы Президентімен телекөпір байланысы орнатылды.
Табиғатты қорғау және экологиялық мәдениетті арттыру мақсатында өткен акцияға қатысушылар арнайы орнатылған LED экран алдына жиналып, телекөпір арқылы Мемлекет басшысымен тікелей байланысқа шықты. Онлайн кездесу барысында Түркістан облысының әкімі Нұралхан Көшеров және «Ақсу-Жабағылы мемлекеттік табиғи қорығының» эко-волентері Айда Орынбасарқызы сөз сөйледі.
Облыс әкімі өңір тұрғындары «Taza Qazaqstan» жалпыұлттық бастамасын белсенді қолдап отырғанын атап өтті.
– Түркістан облысының халқы «Taza Qazaqstan» жалпыұлттық бағдарламасының жазғы маусымын бастауға дайын. Бағдарлама басталғалы өңірде 2 миллионнан астам ағаш егіліп, елді мекендердің санитарлық тазалығы үшін 400-ге жуық жаңа техника сатып алынған. Сонымен қатар 11 саябақ, 8 сквер және 4 аллея пайдалануға берілді. «Мөлдір бұлақ» акциясы аясында 155 бұлақ, 77 өзен тазартылды. Бүгін облыстың барлық аудан, қаласында «Taza Qazaqstan» бағдарламасы аясында ауқымды іс-шара өткізіліп, 20 мың түп ағаш егілді. Іс-шараға 340 техника жұмылдырылды. Нәтижесінде 350 тонна қоқыс шығарылып, 17 мың гектар жер тазарды. Жалпы 2026 жылы 1 миллионнан астам ағаш егу жоспарланып отыр, – деген облыс әкімі биыл әйгілі «Ақсу-Жабағылы» қорығына 100 жыл толып отырғанын айтып, қорық ұжымы жануарлар мен өсімдіктер әлемін жанашырлықпен қорғап келе жатқанын жеткізді.
Телекөпір аясында Түркістан облысымен қатар Павлодар облысы, Батыс және Шығыс Қазақстан облыстары тікелей эфирге қосылды. Жалпы қорық аумағында өткен шараға 2 мыңнан аса адам қатысып, 1000 түп көшет егілді.
Айта кетейік, 1926 жылы құрылған «Ақсу-Жабағылы» қорығы – еліміздегі тұңғыш табиғи қорық. Қорық аумағы 131 мың гектардан асады және Қырғызстан мен Өзбекстан мемлекеттерімен шекаралас орналасқан.
Қорық флорасы мен фаунасы ерекше бай. Мұнда 1300-ден астам өсімдік түрі, соның ішінде сирек кездесетін қызғалдақтар өседі. Сонымен қатар қар барысы, арқар, таутеке, сілеусін, қоңыр аю сияқты сирек жануарлар мекендейді. Ақсу-Жабағылы қорығы тек табиғатты қорғау орны ғана емес, сонымен қатар ғылыми зерттеу жүргізетін маңызды аймақ. Ол ЮНЕСКО-ның биосфералық резерваттар тізіміне енгізілген.

Түркістан облысында ұйымдастырылған экологиялық акциялар барысында қалалар мен ауылдық елді мекендерде сенбіліктер өткізіліп, көшелер, саябақтар, өзен-көл жағалаулары тазартылуда. Бұл жұмыстарға мемлекеттік мекемелермен қатар, еріктілер, жастар ұйымдары және жергілікті тұрғындар белсене қатысуда. Мұндай ортақ әрекет қоғамдағы бірлік пен азаматтық жауапкершілікті күшейтеді.

Экологиялық мәдениетті қалыптастыру – өңірдің әлеуметтік дамуының маңызды бөлігі. Себебі таза орта тұрғындардың денсаулығына тікелей әсер етеді. Қоршаған ортаның ластануының алдын алу, жасыл аймақтарды көбейту және табиғатты қорғау шаралары халықтың өмір сапасын арттыруға ықпал етеді. Осы тұрғыдан алғанда «Таза Қазақстан» бастамасы әлеуметтік саясаттың маңызды құрамдас бөлігіне айналып отыр.

Түркістан қаласы мен өңірде соңғы жылдары жасыл аймақтарды кеңейту жұмыстары қарқынды жүргізілуде. Ағаш отырғызу акциялары, саябақтарды абаттандыру және экопарктер салу сияқты жобалар халықтың демалыс мәдениетін дамытуға жағдай жасайды. Бұл өз кезегінде қалалық ортаның жайлылығын арттырып, тұрғындардың әлеуметтік белсенділігін күшейтеді.

Экологиялық акциялар экономикалық тұрғыдан да жанама әсер береді. Таза әрі абаттандырылған аймақтар туризмді дамытуға жол ашады. Туристер үшін қолайлы орта қалыптасып, қызмет көрсету саласы жанданады. Бұл шағын және орта бизнестің дамуына, жаңа жұмыс орындарының ашылуына ықпал етеді. Сонымен қатар, экологиялық стандарттарды сақтау инвестициялық тартымдылықты арттырады.

Әлеуметтік даму тұрғысынан алғанда, мұндай бастамалар жастар тәрбиесінде де маңызды рөл атқарады. Жастар табиғатты қорғау мәдениетін бойына сіңіріп, қоғамға пайдалы азамат ретінде қалыптасады. Мектептер мен жоғары оқу орындарында өткізілетін экологиялық сабақтар мен акциялар олардың дүниетанымын кеңейтеді.

Сонымен бірге, өңірде тұрмыстық қалдықтарды басқару жүйесін жетілдіру, қайта өңдеу технологияларын енгізу және су ресурстарын тиімді пайдалану бағытында да жұмыстар жүргізілуде. Бұл шаралар экологиялық тұрақтылықты қамтамасыз етіп, ұзақ мерзімді әлеуметтік дамуға негіз қалайды.

Жалпы алғанда, Түркістан облысы аумағында жүзеге асырылып жатқан Таза Қазақстан экологиялық акциясы өңірдің әлеуметтік дамуына тікелей ықпал етіп отыр. Ол халықтың өмір сапасын жақсартып қана қоймай, экологиялық мәдениетті қалыптастырып, тұрақты дамудың берік негізін құруға мүмкіндік береді.