Түркістан облысының әкімі Нұралхан Көшеров «UBC Group» компаниясының құрылтайшысы Игорь Бурдыленкомен кездесу өткізді. Кездесу барысында өңірде жүзеге асқан инвестициялық жобалардың қазіргі жағдайы мен оларды одан әрі дамыту жолдары жан-жақты талқыланды. Түркістан облысында тоңазытқыш шығаратын зауыттың кеңейтіліп, жылдық қуатының 50 мың данаға дейін артуы – өңірдің индустриялық және әлеуметтік-экономикалық дамуындағы маңызды кезеңдердің бірі. Бұл жоба аймақтағы өндіріс көлемін ұлғайтып қана қоймай, жаңа жұмыс орындарын ашу арқылы халықтың әл-ауқатын жақсартуға тікелей ықпал етеді.
Келіссөз барысында облыс әкімі Нұралхан Көшеров Түркістан облысының өндірістік әлеуетін арттыру, жаңа жұмыс орындарын ашу және экспорт көлемін ұлғайту мәселелеріне ерекше назар аударды. Әсіресе, «UBC Group» компаниясының қатысуымен іске асқан жобалардың тиімділігін күшейту және оларды кеңейту мүмкіндіктері сөз болды.
Игорь Бурдыленко компания Орталық Азия нарығын тоңазытқышпен қамту, отандық өндіріс көлемін ұлғайтуға ниетті екенін жеткізді. Кәсіпорын кеңейтіліп, жаңа жұмыс орындарын ашу жұмысы жанданады. Осы ретте, «JASYL SUYQ QAZAQSTAN» тоңазытқыш шығару зауытының екінші кезеңі іске асырылу сатысына өтуде. Жобаның жалпы инвестиция көлемі 1,2 млрд теңгені құрайды және өндірістік әлеуетті айтарлықтай кеңейтуге мүмкіндік береді. Жоба аясында жалпы ауданы 1900 шаршы метрді құрайтын жаңа өндірістік ғимарат салу көзделген. Аталған инфрақұрылым заманауи талаптарға сай жабдықталып, өндіріс тиімділігін арттыруға бағытталады сонымен қатар, кәсіпорында қосымша 50 жаңа жұмыс орны ашылып, өңір тұрғындарын тұрақты жұмыспен қамтуға мүмкіндік береді.
Өндіріс орнының жылдық қуаттылығы 50 000 дана мұздатқыш шығаруға жетеді деп жоспарлануда. Бұл көрсеткіш кәсіпорынның ішкі нарықтағы сұранысты қамтамасыз етіп қана қоймай, экспорттық әлеуетін де арттырмақ. Бұдан бөлек, жоба аясында 2 қосалқы өндіріс орнын іске қосу қарастырылған, бұл өндірістік тізбекті толықтырып, қосымша құнды арттыруға ықпал етеді.
Қазіргі уақытта кәсіпорын өнімдері Өзбекстан және Қырғызстан елдеріне экспортталуда. Алдағы кезеңде экспорт географиясын кеңейту жоспарланып отыр. Атап айтқанда, Әзербайжан, Грузия, Армения, Моңғолия, Тәжікстан және Түрікменстан нарықтарына шығу көзделген.
Кездесу қорытындысы бойынша қос тарап алдағы уақытта бірлескен жобаларды жүйелі түрде жүзеге асыру және өңірдің әлеуметтік-экономикалық дамуын жаңа деңгейге көтеруге уағдаласты. Кездескен мәселелерді бірлесіп шешуге келісті.
Айта кетейік, былтыр Түркістан облысындағы шағын өнеркәсіптік парк аумағында «UBC Group» халықаралық компаниясының тоңазытқыш шығаратын «Jasyl suyq Qazaqstan» зауыты іске қосылған болатын. Жобаның алғашқы кезеңінде жылына 40 мың сауда тоңазытқышын шығару жоспарланып, 350-ге жуық адам жұмыспен қамтылған болатын. Жалпы 1000 жұмыс орнын ашу көзделген және осы бағытта жоба кеңейтіліп жатыр.
Бұл бастама шағын және орта бизнестің дамуына да серпін береді. Өндіріс айналасында қосалқы бөлшектерді жеткізу, логистика, қызмет көрсету секілді бірқатар қосымша салалар қалыптасады. Нәтижесінде кәсіпкерлік белсенділік артып, жаңа экономикалық байланыстар пайда болады. Мұндай кешенді даму өңір экономикасының тұрақтылығын күшейтеді.
Әлеуметтік тұрғыдан алғанда, зауыттың кеңеюі жергілікті тұрғындарды тұрақты жұмыспен қамтуға мүмкіндік береді. Жаңа жұмыс орындарының ашылуы жастардың өңірде қалып, еңбек етуіне жағдай жасап, көші-қон деңгейін төмендетуге ықпал етеді. Сонымен қатар, өндірісте заманауи технологиялардың қолданылуы мамандардың біліктілігін арттыруға, техникалық кадрларды даярлауға жол ашады.
Түркістан облысының дамуы тек өндіріс саласымен шектелмейді. Облыс орталығы – Түркістан қаласы соңғы жылдары қарқынды жаңарып, халықаралық деңгейдегі туристік және рухани орталыққа айналды. Туризм, құрылыс, қызмет көрсету салаларының қатар дамуы өңірдің экономикалық құрылымын теңгерімді етуге мүмкіндік беріп отыр.
Соңғы жылдары өңірде индустриялық аймақтар мен шағын өндірістік парктер құру арқылы инвестициялық ахуал жақсарып келеді. Бұл өз кезегінде ірі өндірістік жобаларды жүзеге асыруға жол ашып, жаңа кәсіпорындардың іске қосылуына себеп болуда. Тоңазытқыш зауытының кеңейтілуі – осындай жүйелі жұмыстың нақты нәтижесі.
