Түркістан облысы Жетісай ауданында спорт саласының дамуына сүбелі үлес қосып келе жатқан талантты бапкер, білікті басшы, Жетісай аудандық мәдениет, тілдерді дамыту, дене шынықтыру және спорт бөлімінің «Жетісай спорт клубы» КММ құрылғанына 5 жыл толуы мен клуб директоры Таласхан Битуреевтың 50 жас мерей тойына орай кіші футбол мен волейболдан 50 жастан асқан ардагерлер арасында халықаралық турнир ұйымдастырылды.
Аудан спортын дамытуға бағытталған айтулы шараға Астана, Алматы және Шымкент қалалары мен облыс аумағындағы аудан-қалалардан, көршілес Өзбекстан Республикасынан командалар қатысып, өзара бақ сынасты. Турнир барысында әр команда өздерінің жоғары дайындықтарын көрсетіп, тартысты әрі қызықты ойын өрнегін көрсетті.
Тек спорттық бәсеке ғана емес, сонымен қатар достық қарым-қатынасты нығайтып, өңіраралық байланыстарды дамытуға мүмкіндік берген маңызды шараның салтанатты ашылу рәсіміне аудан әкімінің орынбасары Серік Пірімбеков пен аудандық мәслихат төрағасы Медет Қасымов, «AMANAT» партиясы Жетісай аудандық филиалының төрағасы Асқар Қайназаров, аудандық қоғамдық кеңес төрағасы Тұрышбек Елшібаев пен аудандық мәдениет, тілдерді дамыту, дене шынықтыру және спорт бөлімінің басшысы Еркебұлан Сейдалиев, қала әкімі Нұрлыбек Бахтияров пен спорт ардагерлері қатысты.
Шара барысында 30 жылға жуық уақытын спорт саласына арнаған Таласхан Битуреевқа құрмет көрсетіліп, арнайы құттықтаулар табысталды. Шәкірттері арғымақ мінгізіп, алғыстарын айтты.
Аудан жастары мен жасөспірімдерінің бос уақыттарын тиімді ұйымдастыру, салауатты өмір салтын насихаттау, бұқаралық спортты дамыту арқылы дені сау ұрпақ, болашақ чемпиондарды тәрбиелеу ісінде сүбелі үлес қосып келе жатқан Таласхан Мырзабекұлы ҚР Мәдениет және спорт министрлігінің «Алтын қыран» орденімен, сондай-ақ «ҚР Тәуелсіздігіне 20 жыл», «ҚР Тәуелсіздігіне 30 жыл» мерекелік медальдарымен марапатталған. Бұдан бөлек облыс әкімі мен Жетісай, Мақтаарал аудандары әкімдерінің, облыстық дене шынықтыру және спорт басқармасының алғыс хаттарына ие болған. Волейбол спортынан ҚР спорт шеберлігіне үміткер, спорт саласының үздігі ретінде де көпшілікке жақсы таныс.
Тартысты өткен турнир қорытындысы бойынша үздік нәтиже көрсеткен командалар мен жекелеген ойыншылар арнайы кубоктармен, медальдармен, дипломдармен және қаржылай сыйлықтармен марапатталды. Тағылымы жарыс өңір спортының дамуына тың серпін беріп қана қоймай, ардагер спортшылардың тәжірибесін кейінгі буынға үлгі етуге үлкен септігін тигізді.
Айта кетейік, айтулы спорт додасына кіші футболдан 10 команда, волейболдан 8 команда қатысты.
Соңғы жылдары Түркістан облысында спорт инфрақұрылымы қарқынды дамып келеді. Жаңа спорт кешендері салынып, ауылдық жерлерде спорт алаңдары көбейіп, жастар мен тұрғындардың спортпен тұрақты айналысуына жағдай жасалуда. Осындай жүйелі жұмыстардың нәтижесінде өңірде бұқаралық спортқа қызығушылық артып, түрлі деңгейдегі жарыстар жиі ұйымдастырылуда.
Таласхан Битуреев басқарып отырған «Жетісай спорт клубы» осы бағыттағы маңызды орталықтардың біріне айналды. Клубтың 5 жыл ішінде жеткен жетістіктері – өңірдегі спорт саясатының тиімді жүзеге асып жатқанын көрсетеді. Мұнда тәрбиеленген спортшылар облыстық, республикалық жарыстарда жоғары нәтижелер көрсетіп, аймақ абыройын асқақтатып келеді.
Ардагерлер арасында ұйымдастырылған халықаралық турнирдің маңызы ерекше. Бұл жарыс аға буын өкілдерінің белсенді өмір салтын ұстануына серпін беріп қана қоймай, жастарға үлгі боларлық өнеге көрсетті. Спорт арқылы денсаулықты нығайту, достықты дәріптеу және тәжірибе бөлісу – мұндай шаралардың басты құндылығы.
Қорыта айтқанда, Жетісай ауданында өткен бұл халықаралық турнир – Түркістан облысындағы спорт саласының жүйелі дамуының нақты дәлелі. Мұндай бастамалар өңірде салауатты өмір салтын қалыптастырып, спорт мәдениетін нығайтуға және болашақ чемпиондарды тәрбиелеуге берік негіз қалайды.
