ТҮРКІСТАН ОБЛЫСЫНДА ҰЛТТЫҚ КІТАП КҮНІНЕ ОРАЙ МӘДЕНИ ШАРА ӨТТІ

24

Түркістан облысының рухани өмірінде айрықша орын алатын мәдени шаралардың бірі – облыстық «Фараб» әмбебап ғылыми кітапханасында өткен Ұлттық кітап күніне арналған «Артық білім кітапта…» атты мәдени-танымдық кеш болды. Бұл шара өңірдегі мәдениет пен өнердің, білім мен руханияттың өзара сабақтастығын айқын көрсеткен тағылымды басқосу ретінде ерекшеленді.

Аталған кештің басты мақсаты – кітап оқуды насихаттау, жастардың рухани дүниесін байыту және ұлттық құндылықтарды дәріптеу. Шара барысында қатысушылар әдеби шығармалардан үзінділер оқып, ой-пікірлерімен бөлісті. Сонымен қатар, жергілікті ақын-жазушылардың шығармашылығына арналған көрмелер ұйымдастырылып, әдебиет пен өнердің өзара байланысы кеңінен насихатталды.

Кеш Ы.Алтынсарин атындағы облыстық балалар кітапханасымен бірлесіп ұйымдастырылған. Жиынның ашылу салтанатына ҚР Жазушылар одағының облыстық филиалының төрағасы, ақын Айдар Бастарбекұлы, облыстық «Фараб» әмбебап ғылыми кітапханасының директоры Жанат Сәдібекқызы мен Ы.Алтынсарин атындағы облыстық балалар кітапханасының директоры Рысбек Ермекұлы қатысып, рухани мерекемен құттықтады.

Сонымен қатар, кешке ҚР Журналистер одағының мүшесі, ҚР Құрметті журналисі Роза Сыздыққызы, ҚР Журналистер одағының және Түркі әлемі Жазушылар одағының мүшесі Несіпкүл Мейманханқызы,«Бітімгер» медиаторлар қоғамдық бірлестігінің басшысы Бақытжан Жармаханұлы қатысты. Сондай-ақ ақын Асылзат Арыстанбек, Түркістан қалалық Оқушылар сарайының директоры Индира Икапова және жас ақын, журналист Бауыржан Ерман қатысып, өз ойларымен бөлісті.
Салтанатты шара аясында облыстық кітапханалардың мерейлі жылдарына орай арнайы кітап көрмелері ұйымдастырылды. Тарқата айтсақ, биыл «Фараб» кітапханасына – 5 жыл болса, Ы.Алтынсарин атындағы облыстық балалар кітапханасына – 65 жыл толып отыр. Келушілер назарына сирек басылымдар мен құнды кітап қорлары ұсынылып, кітапханалардың бүгінгі тыныс-тіршілігі жан-жақты көрсетілді. Шара концерттік бағдарламаға ұласып, сахна төрінде ағартушы ұстаз Ы.Алтынсариннің бейнесі сомдалды. Сонымен қатар, мектеп оқушылары Абай Құнанбайұлының өлеңдерін жатқа оқыды.

Түркістан өңірінде соңғы жылдары мәдени іс-шаралар жүйелі түрде өткізіліп келеді. Бұл – аймақтың тек тарихи-туристік орталық қана емес, сонымен қатар рухани және мәдени дамудың да маңызды ордасына айналып отырғанының дәлелі. Осындай кештер арқылы жастардың өнерге, әдебиетке деген қызығушылығы артып, шығармашылық қабілеттерін дамытуға мүмкіндік туындайды.

Шара барысында өнер мен әдебиет үндестігі ерекше байқалды. Кешке қатысушылар поэзия оқып қана қоймай, музыкалық және театрландырылған қойылымдар арқылы кітаптың құндылығын көркем түрде жеткізді. Бұл мәдениет пен өнердің бір-бірін толықтырып, адамның жан дүниесін байытатын күш екенін көрсетті.

Сонымен қатар, мұндай мәдени-танымдық іс-шаралар өңірдегі шығармашылық орта қалыптастыруға ықпал етеді. Жас қаламгерлер мен өнерпаздар үшін бұл – өз таланттарын көрсетуге берілген мүмкіндік. Нәтижесінде, Түркістан облысында жаңа әдеби есімдер мен өнер иелері қалыптасып, ұлттық мәдениеттің дамуына үлес қосуда.