Түркістан облысында туризм саласын дамытуға бағытталған маңызды қадам жасалды. SCAT әуе компаниясы, Open Turkistan туристік ақпараттық орталығы және Шымкент қаласының туризм басқармасы арасында үшжақты ынтымақтастық туралы жол картасына қол қойылды.
Бұл бастама өңірдің туристік әлеуетін арттыруға, әуе қатынастарын кеңейтуге және Түркістанға келетін туристер санын көбейтуге жаңа серпін береді. Әсіресе ішкі және халықаралық рейстердің дамуы аймаққа қолжетімділікті арттырып, саяхатшылар үшін қолайлы жағдай қалыптастырады. Нәтижесінде Түркістан тек рухани орталық ретінде ғана емес, заманауи туристік бағыт ретінде де танымал бола түседі.
Ынтымақтастық аясында бірлескен жобалар жүзеге асырылып, туризм индустриясын ілгерілетуге бағытталған кешенді шаралар қолға алынбақ. Атап айтқанда, ақпараттық ілгерілету, жаңа туристік өнімдерді әзірлеу, турпакеттерді әртараптандыру және өңірдің халықаралық деңгейдегі имиджін нығайту бағытында жүйелі жұмыстар жүргізіледі. Сонымен қатар цифрлық технологияларды енгізу арқылы туристерге қызмет көрсету сапасын арттыру көзделіп отыр.
Жол картасының тағы бір маңызды тұсы – Түркістан облысын ілгерілету жұмыстарының жаңа деңгейге көтерілуі. Енді SCAT әуе компаниясының рейстерімен ұшатын жолаушылар ұшақ бортында-ақ өңірдің брендтік бейнесімен таныса алады. Ұшақ ішіндегі визуалды материалдар, бейнероликтер мен ақпараттық өнімдер арқылы Түркістанның тарихи-мәдени мұрасы, туристік нысандары кеңінен насихатталады. Бұл – туристердің қызығушылығын оятатын тиімді маркетинг құралдарының бірі.
Сонымен қатар әуекомпанияның борттық журналында жарияланған арнайы материалдар мыңдаған жолаушыға көне шаһардың ерекшелігін таныстыруға мүмкіндік береді. Мұндай тәсілдер халықаралық тәжірибеде кеңінен қолданылып, туристік бағыттарды ілгерілетудің нәтижелі құралы ретінде дәлелденген.
Айта кету керек, Түркістан өңірі соңғы жылдары туризм саласында қарқынды дамып келеді. 2025 жылдың қорытындысы бойынша облысқа келген туристер саны 500 мыңнан асып, өткен жылдың сәйкес кезеңімен салыстырғанда 15,9 пайызға артқан. Ал тарихи орындарға саяхаттаушылар саны 1 миллион 12 мың адамды құрап, бұл көрсеткіш 13 пайызға өскен. Бұл – өңірдің туристік тартымдылығының жылдан-жылға артып келе жатқанын көрсетеді.
Бүгінде облыста туристерге қызмет көрсететін 265 орналастыру орны жұмыс істейді. Қонақ үйлер, демалыс аймақтары мен хостелдердің санының артуы туристер үшін қолайлы инфрақұрылым қалыптастыруға мүмкіндік беріп отыр. Бұл көрсеткіштің 12,7 пайызға өсуі де салаға инвестиция тартудың нәтижесі екенін аңғартады.
Сарапшылардың пікірінше, мұндай стратегиялық серіктестіктер Түркістан облысының экономикалық дамуына да оң әсер етеді. Туризмнің дамуы жаңа жұмыс орындарын ашып, шағын және орта бизнестің өркендеуіне жол ашады. Сонымен қатар қызмет көрсету саласының сапасы артып, жергілікті тұрғындардың әл-ауқаты жақсара түседі.
Жалпы алғанда, аталған үшжақты келісім – Түркістанды Орталық Азиядағы жетекші туристік орталықтардың біріне айналдыру жолындағы маңызды бастама. Әуе қатынасы, ақпараттық ілгерілету және инфрақұрылымды дамыту бағыттарының қатар жүруі өңірдің туристік әлеуетін толық ашуға мүмкіндік береді.
