Биыл Түркістан облысы Қазығұрт ауданында жалпы құны 52,3 млрд теңгені құрайтын 16 ірі инвестициялық жобаны іске асыру жоспарлануда. Бұл бастама өңірдің экономикалық дамуына тың серпін беріп, өндірістік әлеуетін арттыруға бағытталған маңызды қадамдардың бірі саналады. Нәтижесінде 327 жаңа жұмыс орны ашылады. Оның ішінде, ауыл шаруашылығы саласында 13,6 млрд теңгеге 7 жоба, өнеркәсіп саласында 38,7 млрд теңгеге 9 жоба іске асырылмақ. Бұл туралы Түркістан облысының әкімі Нұралхан Көшеровтің төрағалығымен өткен инвестициялық штаб отырысында баяндалды.
Ауданда шағын өндірістік алаңдарды дамыту бағытында нақты жұмыстар атқарылып жатыр. Қазіргі уақытта Тұрбат ауылында 1 гектар аумақта орналасқан өндірістік алаңда 6 жоба іске асырылып, кәсіпкерлерді орналастыру жұмыстары жүргізілуде. Ал Қызылқия елді мекенінде тағы 5 инвестициялық жобаның құрылыс жұмыстары мамыр айында басталады. Одан бөлек, агроөнеркәсіп кешенінде ірі жобалар қолға алынған. Тұрбат ауылында 60 гектар аумақта жылыжай кешені салынуда. Сонымен қатар «Қарқын 2030» серіктестігі 5 000 басқа арналған мал бордақылау алаңын салып жатыр. «Қанатбек» шаруа қожалығы 1 000 басқа арналған мал шаруашылығы кешенін, ал «Маржан и К» серіктестігі 300 басқа арналған сүт-тауарлы ферманы іске қосуды жоспарлап отыр.
Қайта өңдеу және тамақ өнеркәсібінде де оң серпін бар. «Қарқын 2030» серіктестігі шұжық өндірісін ұлғайтса, «Көрік» серіктестігі шырын өнімдерін шығару көлемін арттыруда. «САПА 2002» серіктестігі су үнемдеу технологияларын енгізіп, ауыл шаруашылығы өнімдерін терең өңдеу жобаларын жүзеге асыруда.
Өнеркәсіп саласында бірқатар ірі жоба қолға алынған. Атап айтқанда, «AGRO-IRRIGATION» ЖШС құбыр шығару өндірісін, «ALPHA CONSULTING» ЖШС құрылыс материалдарын өндіру кәсіпорнын, «ЮСТАЛЬКОН» ЖШС металл конструкцияларын шығару зауытын іске асыруда. Сонымен қатар «Бес құдық тас» серіктестігі кварц құмын өңдеу жобасын қолға алған. Энергетика саласында «SMART RE ENERGY» және «ASR ENERGY» компаниялары су электр станцияларын салуды жоспарласа, «Оңтүстік Жарық Транзит» қуаттылығы 250 МВт болатын қосалқы станция құрылысын бастамақ. Халықаралық әріптестік аясында Қытай Халық Республикасымен байланыс нығайып, теріні терең өңдеу (желатин өндіру) жобасы бойынша келісімге қол жеткізілді. Жоба биыл іске қосылады деп жоспарлануда.
Сонымен қатар осы жылы шағын және орта бизнесті дамыту мақсатында жалпы құны 7,2 млрд теңгені құрайтын 42 жоба жүзеге асырылып, 361 жаңа жұмыс орны ашылады.
Жалпы, Қазығұрт ауданында инвестициялық белсенділік артып, экономиканың барлық салаларында тұрақты өсім қамтамасыз етілуде.
Айта кетейік, 2025 жылы Қазығұрт ауданында негізгі капиталға тартылған инвестиция көлемі 47,9 млрд теңгені құрап, өткен жылдың тиісті кезеңімен салыстырғанда 106,4%-ға артты. Инвестициялардың 89,6%-ы жеке қаражат есебінен, 4,6%-ы бюджеттен, ал 5,6%-ы өзге де қарыз қаражаттары есебінен қалыптасты. Соңғы 3 жылда аудан экономикасына тартылған инвестиция көлемі 125 млрд теңгеге жетті.
Аталған жобалардың іске асырылуы нәтижесінде 327 жаңа жұмыс орны ашылады деп күтілуде. Бұл, ең алдымен, аудан тұрғындарын тұрақты жұмыспен қамтуға мүмкіндік беріп, халықтың табысын арттыруға оң ықпал етеді. Әсіресе ауылдық жерлерде жаңа жұмыс орындарының пайда болуы әлеуметтік тұрақтылықты нығайтып, көші-қон үдерісін азайтуға сеп болады.
Инвестициялық жобалар негізінен ауыл шаруашылығы, өңдеу өнеркәсібі, құрылыс материалдарын өндіру және қызмет көрсету салаларын қамтиды. Бұл бағыттардың дамуы аудан экономикасын әртараптандырып, ішкі нарықты отандық өніммен қамтамасыз етуге жол ашады. Сонымен қатар, жаңа өндіріс орындарының ашылуы шағын және орта бизнестің дамуына мультипликативті әсер беріп, қосымша кәсіпкерлік бастамалардың пайда болуына ықпал етеді.
Экономикалық тұрғыдан алғанда, мұндай ірі жобалардың жүзеге асуы бюджетке түсетін салық түсімдерін арттырып, инфрақұрылымды дамытуға қосымша мүмкіндік береді. Жол, электр, су және логистикалық жүйелердің жақсаруы өз кезегінде инвесторлар үшін қолайлы орта қалыптастырады.
Сондай-ақ, инвестициялық белсенділіктің артуы Түркістан облысының жалпы өңірлік өнімінің өсіміне тікелей әсер етеді. Бұл аймақтың экономикалық тартымдылығын күшейтіп, жаңа инвесторларды тартуға жол ашады.
Жалпы алғанда, Қазығұрт ауданында жүзеге асырылатын 16 инвестициялық жоба – өңір экономикасын нығайтуға, халықтың әл-ауқатын арттыруға және тұрақты дамуды қамтамасыз етуге бағытталған стратегиялық маңызы зор бастама.
