Облыс орталығы Түркістан қаласында Халықаралық бишілер күніне орай ұйымдастырылған «TURAN DANCE» республикалық би байқауы – мәдениет пен өнерді тоғыстырған маңызды шығармашылық алаңдардың бірі. Аталған шара тек би өнерін насихаттаумен шектелмей, ұлттық және әлемдік мәдениеттер арасындағы өзара байланыстарды нығайтуға ықпал етеді.
Байқаудың басты маңыздылығы – халық билері арқылы әр ұлттың болмысын, тарихы мен дәстүрін сахна тілімен жеткізуінде. Қатысушы ұжымдар өз елдерінің мәдени ерекшеліктерін би арқылы көрсетіп, көрерменге терең мазмұн мен эстетикалық әсер сыйлайды. Бұл өз кезегінде мәдени әртүрлілікті құрметтеуге, ұлттар арасындағы достық пен ынтымақтастықты арттыруға мүмкіндік береді.
Іс-шараны Түркістан облысы әкімінің орынбасары Ертай Алтаев ашып беріп, қатысушыларға сәттілік тіледі. Ол өз сөзінде өңірде мәдениет саласын дамыту бағытында жүйелі жұмыстар атқарылып жатқанын атап өтті.
– Түркістан – еліміздің ғана емес, күллі Түркі жұртының рухани-мәдени кеңістігіне айналды. Былтыр Мемлекет басшысының Жарлығымен ерекше мәртебе беріліп, дамудың жаңа кезеңіне аяқ басып отыр. Осындай шаралардың өтуі – аталған мәртебелі атақты лайықты ұстауға оң ықпалын тигізеді деп сенемін. Өңірімізде Республикалық, Халықаралық деңгейдегі өнер фестивальдері тұрақты түрде ұйымдастырылып келеді. Бүгінгі байқау – соның айқын дәлелі. Өнер додасына елімізге танымал, кәсіби би ұжымдары қатысып, бақтарын сынауда, – деді ол.
Байқаудың мақсаты – еліміздегі кәсіби би өнерін дамыту, шығармашылық ұжымдардың тәжірибе алмасуына жағдай жасау және заманауи әрі дәстүрлі би бағыттарын насихаттау.
Сайыста режиссер, продюсер, ҚР Мәдениет саласының үздігі, «Құрмет» ордені иегері, Түркістан облыстық мәдениет және халық шығармашылығы орталығының директоры, қазылар алқасының төрағасы Мейіржан Алиакбар, педагог-хореограф, ҚР мәдениет қайраткері, педагогика ғылымдарының докторы, Қазақ ұлттық хореография академиясының өнертану профессоры, «Қазақстан хореографтар одағының» мүшесі Айгүл Күлбекова, ҚР Мәдениет саласының үздігі, Қазақ ұлттық хореография академиясының докранты, халықаралық, республикалық байқаулардың лауреаты Алмат Шәмшиев қазылық етті.
Қазылар алқасы би ұжымдарының орындаған қойылымының сахналық және көркемдік деңгейіне, халықтық би элементтерінің дұрыс әрі таза орындалуына баса назар аударып, әділ баға берді. Байқау қорытындысы бойынша Бас жүлде Қызылорда облысынан келген «Томирис» би ансамбліне бұйырды. І орынды Түркістан облысының «Би Сұлтан» би ансамблі иеленсе, ІІ орын Астана қаласынан келген ҚР Ұлттық Ұлан ән-би ансамбліне табысталды. Ал ІІІ орынға Астана қаласынан келген «Alem заманауи» би ансамблі ие болды.
Сонымен қатар Қарақалпақтан келген «Айқұлаш» ұлттық мемлекеттік фольклор ансамблі, Шымкент қаласынан келген «Шамсинур» би ансамблі, Орал қаласынан келген «Арна» би ансамблі, түркістандық «Samgau» би ансамблі және тараздық «Шолпы» би ансамбльдеріне арнайы жүлде табысталды.
Айта кетейік, биыл байқауға 70-тен астам үміткер өтінім жолдап, оның ішінде іріктеуден 25 өнер ұжымы өтті. Байқау ертең де заманауи би жанры бойынша жалғасады. «Керуен сарай» туристік кешенінде сағат 19:00-де басталады.
Сонымен қатар, «TURAN DANCE» байқауы жас бишілер мен кәсіби ұжымдар үшін тәжірибе алмасу алаңы болып табылады. Әртүрлі өңірлер мен мемлекеттерден келген қатысушылар бір-бірінің орындау мәнерін көріп, жаңа бағыттар мен стильдерді меңгеруге мүмкіндік алады. Бұл шығармашылық дамуға жол ашып, би өнерінің сапалық деңгейін арттырады.
Іс-шараның Түркістан қаласында өтуі де ерекше мәнге ие. Рухани астана саналатын бұл өңірде ұйымдастырылған байқау ұлттық құндылықтарды дәріптеумен қатар, қаланың мәдени-туристік әлеуетін арттыруға септігін тигізеді. Сонымен бірге, мұндай ауқымды шаралар жастардың өнерге деген қызығушылығын оятып, оларды шығармашылыққа баулуға ықпал етеді.
Жалпы, «TURAN DANCE» республикалық би байқауы – би өнерін дамытуға, мәдени мұраны сақтауға және халықаралық мәдени байланыстарды нығайтуға бағытталған маңызды жоба. Бұл бастама ұлттық өнердің өркендеуіне серпін беріп, Қазақстанның мәдени кеңістігін кеңейтуге өз үлесін қосуда.
