Кентау қаласында қала әкімдігінің ұйымдастыруымен «Отбасы хрестоматиясы» қорының негізін қалаушы, шығыстанушы, жазушы Санжар Керімбайдың қатысуымен «Бала болмысында не бар?» тақырыбында мазмұнды семинар-тренинг өтті. Семинар барысында бала тәрбиесінің психологиялық, рухани және мәдени қырлары кеңінен талқыланды. Спикер ұлттық дүниетаным мен дәстүрлі құндылықтардың бала болмысының қалыптасуындағы маңызын ерекше атап өтті. Оның айтуынша, отбасы мен қоғамның үйлесімді ықпалы арқылы ғана саналы, парасатты ұрпақ тәрбиелеуге болады.
Аталған жиынға қала әкімі Жандос Тасов, қала прокуроры Назарбай Ибраймолдаев, қалалық полиция бөлімі басшысының бірінші орынбасары Азамат Сәрсенқұлов, сондай-ақ ардагерлер, қалалық мәслихат депутаттары, білім саласының қызметкерлері, ата-аналар мен оқушылар қатысты
Тағылымы терең кездесудің негізгі мақсаты – баланың ішкі әлемін, сезімі мен қажеттіліктерін терең түсіндіру арқылы ересектердің балаға деген қарым-қатынас мәдениетін жетілдіру, отбасы мен білім беру ұйымдары арасындағы өзара байланысты нығайту және тиімді тәрбие беру дағдыларын қалыптастыру.
Жиынды ашқан қала әкімі Жандос Тасов ұлттық құндылықтарды дәріптеп, отбасы институтын нығайту жолында аянбай еңбек етіп жүрген қаламгерге алғыс білдіріп, кездесудің өзектілігіне ерекше тоқталды. Қала әкімі өз сөзінде жас ұрпақ тәрбиесі, қоғамның ортақ міндеті екенін атап өтті.
«Бала – біздің болашағымыз ғана емес, ол қоғамның айнасы, ұлттың ертеңгі келешегі. Әрбір баланың бойында табиғат берген ерекше қабілет, шексіз мүмкіндік пен таза болмыс бар. Сол асыл қасиеттерді дер кезінде танып, дұрыс бағыттау – баршамызға ортақ міндет. Бүгінгі семинардың басты мақсаты да, бала тәрбиесіне жаңаша көзқарас қалыптастырып, оның ішкі әлемін терең түсіну. Себебі балаға берілген дұрыс тәрбие, елдің жарқын болашағының кепілі», деді қала әкімі.
Семинар-тренинг барысында Санжар Керімбай бала тәрбиесіне қатысты өзінің көпжылдық ізденістерін, әлемдік тәжірибелер мен ғылыми зерттеулерге негізделген құнды ақпараттарын бөлісті. Ол бала тәрбиесінде ең маңыздысы – оның жан дүниесін түсіну, әр баланың даралығын құрметтеу және мейірім мен сенімге негізделген орта қалыптастыру екенін атап өтті.
Кездесу барысында қатысушылар өздерін толғандырған сұрақтарын қойып, пікір алмасты. Ашық форматта өткен жиын әрбір қатысушыға ой салып, бала тәрбиесіне деген көзқарасты жаңғыртуға мүмкіндік берді.
Мұндай тағылымы мол шаралар алдағы уақытта да өз жалғасын тауып, қоғамдағы отбасы құндылықтарын нығайтуға, өскелең ұрпақтың саналы әрі тәрбиелі болып қалыптасуына оң ықпал етеді.
Аталған семинар өңірдегі мәдени-ағартушылық жұмыстардың жанданып келе жатқанын көрсетеді. Бүгінде Кентау қаласында мәдениет саласы жүйелі түрде дамып, түрлі әдеби кездесулер, танымдық кештер, театрландырылған қойылымдар мен шығармашылық жобалар тұрақты түрде ұйымдастырылып келеді. Бұл шаралар тұрғындардың рухани деңгейін көтеріп, ұлттық мәдениетке деген қызығушылықты арттыруға ықпал етуде.
Сонымен қатар, мәдениет мекемелері мен білім беру ұйымдары арасындағы байланыс нығайып, бірлескен жобалар жүзеге асырылуда. Мұндай бастамалар жас ұрпақтың бойында адамгершілік, отансүйгіштік және мәдени құндылықтарға деген құрметті қалыптастыруға негіз болады.
Жалпы, Кентауда өткен бұл семинар-тренинг – бала тәрбиесін мәдениетпен сабақтастыра отырып дамытуға бағытталған маңызды қадам. Осындай мазмұнды іс-шаралар қоғамда сапалы тәрбие мен рухани жаңғырудың орнығуына ықпал етіп, өңірдің мәдени әлеуетін арттыра түсуде.
