Мемлекет басшысы 2020 жылғы 1 қыркүйектегі «Жаңа жағдайдағы Қазақстан: іс-қимыл кезеңі» атты жолдауында республика көлімінде 2 млрд ағаш отырғызуды тапсырған. Аталған тапсырмаға сәйкес, облыстың орман қоры жерлеріне 2021-2027 жылдары 110 мың гектарға 170 млн көшет егу жұмыстары бойынша арнайы кешенді жоспар бекітілген. Көгалдандыру жұмыстары тек экологиялық емес, сонымен қатар әлеуметтік-экономикалық маңызға да ие. Жасыл аймақтардың көбеюі тұрғындардың өмір сүру сапасын арттырып, қалалар мен ауылдардың тартымдылығын күшейтеді. Бұл өз кезегінде туризмнің дамуына және инвестициялық әлеуеттің артуына оң әсер етеді. Түркістан қаласы мен облыстың басқа да елді мекендері абаттандырылып, заманауи келбетке ие болуда.
Бүгінде 2021-2025 жылдары аралығында 96 мың гектар жерге 146 млн түп көшет егілді. Жоспар 116 пайызға артығымен орындалды. Бұл туралы Түркістан облысының әкімі Нұралхан Көшеровтің төрағалығымен өткен аппарат мәжілісінде айтылды.
Облыс басшысы жауапты басқарма басшысы мен аудан, қала әкімдеріне көктемгі ағаш егу жұмыстарын жүйелі ұйымдастырып, бекітілген жоспардың толық әрі сапалы орындалуын қамтамасыз етуді тапсырды. Сонымен қатар кейбір аудандарда суару жүйелері мен қоршау жұмыстарының төмен деңгейде жүргізіліп жатқанын сынға алып, көшет отырғызу сапасын күшейтуді жеткізді.
Жиында көктемгі ағаш егу жұмыстарына дайындық барысы туралы облыстық табиғи ресурстар және табиғат пайдалануды реттеу басқармасының басшысы Ғалымжан Төлепов баяндама жасап, алдағы жоспарларын атап өтті. Оның айтуынша, 2026-2027 жылдары аралығында қалған 14 мың гектар жерге, 24 млн түп көшет егу жұмыстары толығымен атқарылады. Биылғы наурыз айында 13 600 гектар жер жырту жұмыстары жүргізіледі деп жоспарланған.
2025 жылы облыстағы орман шаруашылығы мекемелеріне қарасты 22 тұқымбақта 30 миллионға жуық көшет өсіріліп, ормандарды толықтыруға 10 миллионнан астам көшет егілді.
Мемлекет басшысының Жолдауына сәйкес, елді мекендерді көгалдандыру аясында облысқа 1,1 млн көшет отырғызу тапсырылған. Өткен жылы 1 065 139 түп көшет егілді. Ал 2026 жылға 1 млн көшет отырғызу жоспарланып отыр. Қазіргі таңда 312 мың көшет аудан-қалаларға таратылған. Көктемгі маусымға дайындық аясында 374 гектар жер қамтылып, суару жүйелері 80 пайызға, қоршау жұмыстары 84 пайызға қамтылған.
Облыс әкімінің тапсырмасына сәйкес 13 аудан, қала әкімдіктерінде жер бөлініп, тұқымбақтар ашылды.
Биыл Наурызнама аясында 23 наурыз – Тазару күніне орай жаппай ағаш отырғызу және тазалық акциялары өткізілді. Нәтижесінде 46 гектар жерге 32 256 түп көшет отырғызылып, 821 гектар аумақ тазартылып, 1032 тонна қоқыс шығарылды.
Сондай-ақ Түркістан қаласы маңында 30 мың гектар аумақта «Жасыл белдеу» қалыптастыру жобасы жүзеге асуда. Қазіргі таңда оның 29 544 гектары мемлекеттік орман қоры санатына енгізілген. 2026 жылғы жоспарға сәйкес, көктемде 100 гектарға 294,1 мың түп сексеуіл, ал күзде 9 415 гектар аумаққа 776 мың түп жапырақты ағаш көшеттері отырғызылады.
Жасыл белдеуде отырғызылған көшеттерді суғаруға арналған 390 дана су ұңғымалары жұмыс істейді. Биыл олардың 60-ының насосын жөндеу жоспарланған.
Оған қоса, әуежай жолы бойындағы су жүйелері қысқы маусымда толық тазаланып, вегетациялық кезеңдерге дайындық жұмыстары атқарылды.
Отырғызылған ағаштарды жазғы ыстық ауа-райында бірыңғай суғаруды қамтамасыз ету мақсатында тамшылатып суғару жүйелерін жаңарту және қосымша 4 дана бассейнге қуаттылығы сағатына 80-120 м3 болатын су айдағыш құрылғыларын орнату жоспарлануда.
Алдағы уақытта, Түркістан қаласы айналасы мен облыс көлеміндегі көгалдандыру жұмыстары тұрақты жалғасады.
Көшет отырғызу жұмыстарына орман шаруашылығы мекемелері, жергілікті атқарушы органдар, еріктілер мен тұрғындар белсенді түрде қатысуда. Бұл қоғамның экологиялық мәдениетін арттырып, табиғатты қорғауға деген жауапкершілікті күшейтеді. Сонымен қатар, көгалдандыру саласында жаңа жұмыс орындары ашылып, ауылдық жерлерде маусымдық және тұрақты жұмыспен қамту мүмкіндігі кеңеюде.
Облыста отырғызылатын көшеттердің басым бөлігі жергілікті климатқа бейімделген ағаш түрлерінен тұрады. Бұл олардың жерсіну деңгейін арттырып, ұзақ мерзімді экологиялық тиімділікке қол жеткізуге мүмкіндік береді. Сонымен қатар, су үнемдеу технологияларын қолдану арқылы көшеттерді күтіп-баптау жұмыстары да жетілдірілуде.
Экологиялық бастамалар өңірдің әлеуметтік-экономикалық дамуына кешенді түрде ықпал етуде. Жасыл аймақтардың кеңеюі халық денсаулығын жақсартуға, рекреациялық аймақтардың дамуына және қалалық инфрақұрылымның сапасын арттыруға жағдай жасайды. Бұл өз кезегінде тұрғындардың өмір сапасын көтеріп, өңірдің тұрақты дамуына негіз болады.
Жалпы алғанда, Түркістан облысында жүзеге асырылып жатқан 1 миллион түп көшет отырғызу бастамасы тек экологиялық шара ғана емес, сонымен бірге әлеуметтік-экономикалық дамудың маңызды бөлігі болып табылады. Бұл өңірдің жасыл экономикаға бет бұруын күшейтіп, болашақ ұрпақ үшін қолайлы орта қалыптастыруға бағытталған стратегиялық қадам.
