Жетісай ауданының әкімі Серік Үсенұлы Мамытовтың тапсырмасына сәйкес соңғы жылдары елді мекендер мен ауданаралық жолдарды қалпына келтіру, тас төсеп, асфальттау, тозығы жеткен немесе жаңадан салынған көшелерде тұрғындарға ыңғайлы жағдай жасау мақсатында ауқымды жұмыстар атқарылуда.
Аудандық тұрғын үй-коммуналды шаруашылығы, жолаушылар көлігі, автомобиль жолдары және тұрғын үй инспекциясы бөлімі тарапынан бірінші кезекте жөнделуі тиіс жолдардың құжаттары жасақталып, ішкі жолдарға төселіп жатқан асфальттардың сапасы, төселген тастар мен асфальттардың құрамы, қалыңдығы мен енінің ұзындығы, нығыздалу коэфиценті қатаң бақылауға алынған.
Аудандағы жолаушылар көлігі және автомобиль жолдары саласын дамыту мақсатында жүргізіліп жатқан жұмыстардың сапасын зерделеу мақсатында аудан басшысы Жетісай қаласындағы бірқатар көшелерде болды. Бүгінде Жетісай қаласындағы жалпы ұзындығы 5,7 шақырымды құрайтын Қ.Омаршаев, А.Қалыбеков және С.Жәштаев (Жоба) көшелеріне 2025 – 2026 жылдарға өтпелі орташа жөндеу жұмыстары жүргізіліп, мамыр айының соңына дейін толық аяқталуы жоспарланған.
Одан бөлек, жалпы ұзындығы 4,9 шақырымды құрайтын М.Жұмабаев, Ш.Айманов, Рудаки, Д.Нұрпеисова, Ш.Уәлиханов, Ақан сері, Ә.Қашаубаев тұйығы және Қостөбе көшелерінің, жалпы ұзындығы 2,5 шақырымды құрайтын Ш.Құдайбердиев, С.Сейфуллин, Оспанов, Малдыбеков және Сүгір көшелерінің орташа жөндеу жұмыстарын бастауға тиісті қаржылар қарастырылған.
Зерделеу барысында аудан әкімі жауапты сала басшылары мен қала әкіміне жұмыстың сапасын қатаң бақылауда ұстауды, мердігер мекеме басшыларына өндірістік кестеден кешікпей уақытылы аяқтауды тапсырды.
Сонымен қатар, шағын және орта бизнесті дамыту – еліміздің жалпы ішікі өнімін арттыруда, халықты жұмыспен қамту мәселесінде шешуші фактор болып табылады. Жетісай ауданында түрлі мемлекеттік бағдарламалардың жүйелі жүзеге асырылуының нәтижесінде жыл өткен сайын аиалмыш салада ілгерілеушілік байқалап келеді.
Аудан әкімі Серік Үсенұлы Мамытов салада атқарылып жатқан жұмыстарды көзбен көріп, Жетісай қаласындағы «Жасурбек строй» шағын цехында болды. Темір сымнан тоқылған қоршауларды өндірумен айналысатын кәсәпорын биылғы жылдың наурыз айында кәсіпкердің жеке инвестициялық қаржысы есебінен іске қосылған. Өндірістік қуаттылығы күніне 1500 погонометрді құрайды. Өндіріске қажетті шикізатты Шымкент қаласынан тасымалдайтын цехта 2 азамат тұрақты жұмыспен қамтылған.
Бүгінде жергілікті тұрғындар мен құрылыс компанияларының тапсырысы негізінде жұмыс істеп отырған цех басшысы Жасурбек Сабиров кәсібін кеңейтіп, өнім көлемін арттыру мақсатында алдағы уақытта мемлекеттен жеңілдетілген несие алуға ниетті екенін айтады. Аудан басшысы кәсіпкерге өңдеу өнеркәсібіндегі жобаларды мемлекеттік қолдау мен кәсіпкерлік қызметті реттеу саласындағы заңнамалар аясында қаржыландыру, өндіріске қажетті инфрақұрылымдарды дамыту және мемлекет тарапынан қарастырылған басқа да қолдаулар мен жеңілдіктерді түсіндіріп, пікір алмасты.
Бұдан бөлек, Серік Үсенұлы Мамытов жұмыс жоспарына сәйкес Жылы су ауылдық округіндегі инфрақұрылымдық маңызы нысандардың жай-күйін арнайы көріп, жауапты сала басшыларына бірқатар нақты тапсырмалар берді. Аудан басшысы алдымен облыстық маңызы бар КХ-9 «Гүлістан – Хайдар – Қалшораев – Қарой – Баққоныс – Мырзашоқы – Жылысу – Қоғалы» автомобиль жолының 36+500 шақырымында орналасқан көпірдің күрделі жөндеу жұмыстарының барысын зерделеді.
Көпір бірнеше елді мекенді өзара байланыстырып отырған стратегиялық маңызы бар жол бойындағы нысандардың бірі болғандықтан күрделі жөндеу жұмыстарының сапалы әрі белгіленген мерзімінде пайдалануға берілуінің тұрғындар үшін де, шаруалар үшін де ерекше маңызға ие екенін айтты.
Түркістан облысының жолаушылар көлігі және автомобиль жолдары басқармасының тапсырысы негізінде аталмыш нысанға күрделі жөндеу жұмыстарын жүргізу үшін өткен жылы «Лидер-НС» жауапкершілігі шектеулі серіктестігімен келісім-шарт түзілген. Алайда, мердігер мекеме тарапынан міндеттемелердің уақытылы орындалмауы салдарынан құрылыс жұмыстары өндірістік кестеден кешіккен. Осыған байланысты тапсырыс беруші тарапынан мердігерге айыппұл салынып, өндірілген.
Нысан басында жүргізілген зерделеу барысында аудан әкімі жөндеу жұмыстарының созбалаңға салынуына жол берілмеуі керектігін атап өтіп, 2025–2026 жылдарға өтпелі жұмыстарды толық аяқтау үшін бір ай мерзім берді. Бақылауды күшейтуді тапсырды.
Сонымен қатар, аудан басшысы Мырзашоқы елді мекені маңындағы жөндеуді қажет ететін шаруашылық көпірінің техникалық жағдайымен де танысты. Аталған өткел ауыл шаруашылығы саласында еңбек етіп жүрген шаруалардың егістік алқаптарға қатынауы үшін аса маңызды нысан саналатындықтан көлік қатынасын жеңілдету және ауыл шаруашылығы жұмыстарын жүйелі жүргізуге қолайлы жағдай жасау мақсатында қысқа мерзім ішінде қажетті шаралардың жүзеге асырылатынын жеткізді.
«Таза Қазақстан» экологиялық шарасы аясында да аудан көлемінде «Жасыл болашақ» айдарымен ауқымды сенбілік ұйымдастырылды. Қоршаған ортаны қорғау, елді мекендердің санитарлық жағдайын жақсарту және тұрғындар арасында экологиялық мәдениетті қалыптастыру бағытындағы шараға аудан тұрғындары, мемлекеттік және квазимемлекеттік мекеме қызметкерлері, ерікті жастар мен түрлі сала мамандарынан жалпы саны 15 мыңға жуық адам қатысты. 20 арнайы техника жұмылдырылып, белгіленген аумақтар толық қамтылды.
Табиғи ортаны жақсартумен қатар, келешек ұрпаққа жасыл әрі жайлы өмір сүру кеңістігін қалыптастыруға бағытталған маңызды шара барысында аудан аумағында мыңға жуық көшет отырғызылып, елді мекендерді көгалдандыру жұмыстары атқарылды. Мың гектарға жуық аумақ тазартылып, 25 тонна қоқыс шығарылды.
Аудан тұрғындарының тазалыққа деген жауапкершілігінің айқын көрінісі болған санитарлық тазалық жұмыстары барысында республикалық, облыстық және аудандық маңызы бар автомобиль жолдарының бойы, саябақтар мен скверлер, көпқабатты тұрғын үйлердің аумақтары мен арық-атыздар тазартылып, ағаштардың түптері әктелді.
Айта кетейік, аудан әкімі Серік Үсенұлы Мамытовтың тапсырмасымен аудан аумағында тазалықты сақтау, көгалдандыру және абаттандыру жұмыстарын тұрақты түрде жүргізу мақсатында арнайы кесте бекітіліп, түсіндірме жұмыстары күшейтілген. Бұл өз кезегінде тазалық шараларының бір реттік акция ретінде емес, тұрақты дағдыға айналуына негіз қалайды.
Жалпы, «Жасыл болашақ» акциясы – қоршаған ортаны қорғау мен туған жерге деген жанашырлықтың жарқын үлгісі. Мұндай шаралар тұрғындардың табиғатқа деген жауапкершілігін арттырып, елді мекендердің көркеюіне тың серпін беретіні сөзсіз.
