Сауран ауданында өткен аппараттық мәжілісте өңірдің әлеуметтік-экономикалық дамуына қатысты өзекті мәселелер қаралып, нақты тапсырмалар берілді.
Мәжіліс барысында аудан аумағындағы өндірістік парктің жол картасының орындалуы және инвестициялық жобаларды тарту жұмыстарының барысы талқыланды. Жауапты бөлім тарапынан атқарылған жұмыстардың нәтижелері баяндалып, алдағы кезеңге жоспарлар ұсынылды. Инвестициялық ахуалды жақсарту және жаңа жұмыс орындарын ашу бағытындағы шаралар ерекше назарға алынды.
Келесі мәселе ретінде ауылдық округтердегі 2025–2026 жылдарға арналған көктемгі ағаш егу жұмыстарының барысы қаралды. Экологиялық жағдайды жақсарту, елді мекендерді көгалдандыру және тұрғындардың өмір сүру сапасын арттыру мақсатындағы жұмыстардың маңыздылығы атап өтілді.
Сонымен қатар, жер заңнамасын бұза отырып пайдаланылып жатқан және нысаналы мақсатына сай игерілмей жатқан жерлерді мемлекетке қайтару мәселесі көтерілді. Жер қатынастары саласындағы заң талаптарының сақталуы қатаң бақылауға алынатыны айтылды. Жиын соңында орындаушылық тәртіп және елді мекендердегі кемшіліктер бойынша талдау жасалып, жауапты тұлғаларға нақты міндеттер жүктелді.
Аудан әкімі Мақсат Таңғатаров жиын барысында әрбір мәселенің маңыздылығына тоқталып, жауапты бөлімдерге нақты тапсырмалар берді. Әкім өңірдің тұрақты дамуы үшін жүйелі жұмыс жүргізу қажеттігін атап өтті. Тұрғындардың әл-ауқатын арттыруға бағытталған жобалардың сапалы орындалуы басты назарда болатынын жеткізді.
Сонымен қатар, Сауран ауданының әкімі Мақсат Таңғатаров жұмыс сапары аясында Шорнақ ауылдық округіндегі инфрақұрылым нысандарының жай-күйімен танысты. Сапар барысында ауыл ішіндегі жолдардың жағдайы, ауыз су жүйесі, электр желілері және коммуналдық инфрақұрылымдардың жұмыс сапасы қаралды.
Аудан басшысы ауыл аумағындағы балалар саябағын аралап, нысанның қазіргі жағдайын бағалады. Балалардың қауіпсіз әрі қолайлы ортада демалуына жағдай жасау маңызды екенін атап өтіп, саябақты күтіп-ұстау мен абаттандыру жұмыстарын тұрақты жүргізу қажеттігін жеткізді.
Жұмыс барысында инфрақұрылым жүйелерінің сапалы әрі тұрақты қызмет етуі ауыл тұрғындарының тұрмыс деңгейін жақсартуға тікелей әсер ететіні айтылды. Осыған байланысты жауапты сала басшыларына бірқатар нақты міндеттер жүктелді. Сапар кезінде анықталған мәселелер бойынша тиісті бөлімдерге тапсырмалар беріліп, олардың орындалуы аудан әкімдігі тарапынан бақылауда болады.
Бұдан бөлек, ҚР Премьер–министрінің орынбасары Қ.Бозымбаевтың тапсырмасына сәйкес, Түркістан облысында шағын өндірістік парктерді құру тәжірибиесін басқа облыстарда қолдану мәселесін пысықтау мақсатында Қаржы, Өнеркәсіп және құрылыс министрлігі және барлық 17 облыс, 3 қала әкімшілігі өкілдерінен құралған жалпы 40-қа жуық делегация өкілдері Түркістан облысына арнайы іссапармен келді.
Іссапармен барысында, Сауран ауданындағы «SAURAN» өндірістік паркінде болып, жаңбырлатып суғару технологияларын шығаратын «BNK Group», жиһаз өнімдерін өндіретін «Aqniet Holding», өндірістік тоңазытқыш шығаратын «UBC Групп» және басқада бірқатар жобалардың жұмыс барысымен танысты. Сонымен қатар, Сауран ауданы аумағындағы «Иассы», «Ескі Иқан», «Дәморда» және «Қарашық» шағын өндірістік парктердің құрылысымен танысты.
Делегация құрамы өңірде құрылып жатқан шағын өндірістік парктер жұмысын оң бағалап, бұл бастаманың шағын және орта бизнестің және өңірдің бизнес климатының дамуына оң ықпал ететінін атап өтті.
Бүгінгі таңда, облыстың барлық аудан және қалаларында 214 гектар аумақта 25 шағын өндірістік алаңдар құрылды. Алаңдарда 258 өндірістік ғимараттардың құрылыс жұмыстары жүргізілуде. Аталған ғимараттарда орналасатын
жобалармен (251 жоба) келісімдер жасалынған.
Жалпы инвестициялық құны 192,0 млрд. теңге. Нәтижесінде 5 218 жұмыс орны құрылып, болжаммен жылына 96,0 млрд. теңге импротты алмастыру өнімдері өндірілетін болады.
Сондай-ақ, Шаға ауылдық округінде «Euro Sandwich Panel» жауапкершілігі шектеулі серіктестігінің өндірістік цехтарының металл қабырғалары мен сэндвич панель өндіретін жаңа зауыты іске қосылмақ. Аталған жоба өңірдің индустриялық дамуына серпін беріп, жергілікті тұрғындарды жұмыспен қамтуға бағытталған маңызды бастама. Жобаның жалпы құны – 6,5 млрд теңгені құрайды. Кәсіпорын толық іске қосылған жағдайда 100 жаңа жұмыс орны ашылып, аудан тұрғындары тұрақты еңбекпен қамтылмақ. Өндірістік цехтарда құрылыс саласында кеңінен қолданылатын сапалы металл қабырғалары мен сэндвич панельдер өндірілетін болады.
Аталған өндіріс алаңында Сауран ауданының әкімі Мақсат Таңғатаров арнайы болып, жобаның жүзеге асу барысымен танысты. Сонымен қатар, нысанды Түркістан облысы кәсіпкерлік және сауда басқармасының басшысы Нұржігіт Мырзахметовпен бірге аралап, өндіріс цехтарының құрылыс жұмыстары мен болашақ өндірістік қуаттылығын көрді.
Кездесу барысында жауапты мамандар жобаның кезең-кезеңімен жүзеге асырылуы, өндірістік технологиялар және жаңа жұмыс орындарын ашу мәселелері туралы баяндады. Өз кезегінде аудан басшысы өңірде өндіріс орындарын көбейту, кәсіпкерлікті қолдау және халықты тұрақты жұмыспен қамту бағытындағы жұмыстар жалғасатынын атап өтті. Айта кетейік, бұл жоба Сауран ауданындағы индустриялық әлеуетті арттыруға, құрылыс материалдары өндірісін дамытуға және жергілікті экономиканың өсуіне оң ықпал етпек.
Келесі кезекте Сауран ауданының әкімі Мақсат Таңғатаров Үшқайық ауылдық округіне жұмыс сапарымен барып, жаңадан ашылған кәсіпкерлік нысандардың жұмысымен танысты. Ауылдық жерде шағын және орта бизнесті дамытуға бағытталған бұл жобалар өңірдің әлеуметтік-экономикалық дамуына серпін беруде.
Сапар барысында аудан басшысы ауыл шаруашылығының маңызды бағыты – балық шаруашылығын дамытуға үлес қосып отырған кәсіпкерлермен кездесті. Қазіргі таңда Үшқайықта іске асырылып жатқан жобалар алғашқы өнімдерін беріп, нарыққа жол тартты.
Бірінші жоба аясында интенсивті технология қолданылған балық өсіру кешені іске қосылып, алғашқы өнім алынды. Аумағы 1,2 гектарды құрайтын кешендегі бассейннің сыйымдылығы 16 000 текше метрді құрайды. Бүгінде мұнда өсірілген сазан балықтары сатылымға шығарылып, Түркістан және Кентау қалаларының сауда орындарына жеткізілуде. Жалпы 2 миллион уылдырық салынып, нәтижесінде 500 мың шабақ өсіру көзделген. Кәсіпорында 2 адам тұрақты жұмыспен қамтылған.
Екінші жоба бойынша да алғашқы нәтижелер бар. Қазіргі таңда 3 бассейн іске қосылып, бекіре мен сазан балықтары өсірілуде. Кәсіпорын алғашқы өнімдерін алып, оларды Түркістан және Кентау қалаларындағы дүкендер мен қоғамдық тамақтану орындарына сатылымға шығаруда. Алдағы уақытта өндіріс көлемін ұлғайтып, жылына 20 тоннаға дейін балық өндіру жоспарланып отыр. Мұнда 3 адам тұрақты жұмыспен қамтылған.
Аудан әкімі кәсіпкерлердің бастамаларына қолдау білдіріп, жергілікті атқарушы билік тарапынан қажетті көмек жалғасатынын атап өтті.
«Ауыл шаруашылығын әртараптандыру – басты міндеттердің бірі. Балық шаруашылығының дамуы – нақты нәтиже беріп отырған бағыт. Бұл – ауыл тұрғындарының табысын арттыруға және жаңа жұмыс орындарын ашуға мүмкіндік береді», – деді Мақсат Таңғатаров.
Сауран ауданында бұған дейін жылыжай, мал шаруашылығы және егіншілік бағытында бірқатар жобалар жүзеге асқан. Енді балық шаруашылығы да алғашқы өнімін беріп, аудан экономикасының жаңа әрі перспективалы саласына айналып отыр.
