Президентіміз Қасым-Жомарт Тоқаев биылғы Жолдауында Ұлттық қоғамдық сенім кеңесінің табысты еңбегіне айрықша тоқталды.
Шындығында құрылғанына екі жыл ғана болған аталмыш кеңес біршама игі істердің бастамасын жолға салды. Ұстаздар мен дәрігерлердің, студенттер, магистранттар мен докторанттардың жалақысының өсуіне септігін тигізді.
Оңтүстіктен солтүстікке қоныс аударуға берілетін субсидияның көлемін ұлғайтуға да бір кісідей атсалысты. Ауыл шаруашылығы жерлерінің шетел азаматтары мен заңды тұлғаларға сатылуына, жалға берілуіне тосқауыл қоюда белсенділік танытты. Ендігі жерде Президентіміз аталмыш кеңестің құрамын ұлғайтуды тапсырып отыр.
«Біз бірліктің бастауы болған дала демократиясының бастауын жалғастыруымыз керек» деген Қасым-Жомарт Тоқаев. Ұлттық құрылтай құру жөнінде ұсынысын білдірді. «Құрылтай – қоғамдық диалогтың біртұтас институционалдық моделін қалыптастыруға тиіс. Сөйтіп билік пен халық арасындағы дәнекерге айналатын болады»,-деді Президент.
Бұл ұсыныстың халықтың қолдауына ие болары сөзсіз. Қоғамдық кеңестің бәрін айналасына жинақтап алғандықтан, құрылтайдың атқарар жұмысы тиімді, нәтижелі әрі оңтайлы болады. Жолдауда айтылғандай, құрамына барлық аймақтың өкілдері кіргендіктен, халық пен биліктің арасындағы алтын көпір нығай түсері сөзсіз.
Парламент депутаттары, Қазақстан халқы асамблеясы, азаматтық альянс, қоғамдық кеңес пен ұйымдардың мүшелері, белгілі мемлекет қайраткерлері бір кісідей жұмылып жұмыс істегендіктен ел ішіндегі түрлі мәселелер дер кезінде шешімін табады деп сенеміз.
Зарина ЗАГИДУЛЛИНА,
Түркістан облыстық татар-башқұрт этномәдени бірлестігінің мүшесі
