Мемлекет басшысы экономиканы цифрландыру ісін жалғастыру және жасанды интеллект технологиясын кеңінен қолдану аса маңызды екенін атап өткен болатын.
– Экономиканы цифрландыру ісін жалғастыру және жасанды интеллект технологиясын кеңінен қолдану аса маңызды. Біз мемлекеттік және қаржы қызметтерін цифрландыру ісінде айтарлықтай табысқа қол жеткіздік. Мәселен, 2023 жылдың қорытындысы бойынша қолма-қол ақшасыз төлем үлесі 88 пайызға жетті. 2020 жылға дейін бұл көрсеткіш 50 пайыздан аспаған еді. Небәрі төрт жылдың ішінде Қазақстанда қаржы технологиясы қарқынды дамыды. Бұл жетістік экономиканың басқа салаларына да үлгі болуға тиіс, – деді Тоқаев.
Бүгінгі таңда елімізде құрылыс саласы да қызметтерді цифрлық форматқа көшіріп отыр.
Айталық, бір ғана «BI Group» компаниясының өзі айтарлықтай нәтиже көрсетті. Құрылыс компаниясы прогрессивті стандарттарды енгізе отырып, жылжымайтын мүлік пен құрылыс саласындағы өнімдер мен қызметтердің сапасын арттырудың қозғаушы күшіне айналды.
Көптеген қызмет big App мобильді қолданбасында қолжетімді. Қолданба компания клиенттеріне жылжымайтын мүлікті іздеуден бастап тұрудың жайлылығын арттыруға дейінгі онлайн қызметтерді ұсынады. Сондай-ақ сатылымдар мен жарнамалардың басталғаны туралы, тұрғын үйлер жайында және тағы да басқа ақпараттар беретін жаңалықтар лентасы бар. Бұған қоса қажетті құжаттар өтінім бөлімінде қолжетімді. Тұрғын үй мен пәтер қызметтеріне өтінім беру, коммуналдық қызметтерге ақы төлеу, онлайн дауыс беру, тұрғын үй шығыстары туралы есептердің бәрі онлайн. Осы қатарға жеткізу саласын да қосуға болады.
Digital Competitiveness Ranking мәліметінше, табысы жақсы елдер рейтингте жоғары тұр. Сәйкесінше ең соңғы орында кедей мемлекеттер орналасқан. Яғни цифрлық дамуда халықтың әлеуметтік жағдайы, білімге қолжетімділік, цифрлық сауаттылық маңызды рөл ойнайды.
Қазіргі кезде табысы төмен және орташа табысты елдерде қала мен ауыл арасында теңсіздік бар. Бұл біздің елге де қатысты. Өйткені қалалық жерлерде цифрлық қызметтер қолжетімді болғанымен, ел аумағында әлі күнге дейін интернетпен қамтамасыз етілмеген қаншама елді мекен бар. Сондықтан қазіргі кезде дәл осы мәселені шешу – ең үлкен қажеттілік.
