Біз кейде алаңдауға тиісті мәселеге бей-жай қарап, керексіз дүниелерге көп көңіл бөліп жатамыз. Салдарын көргенде ғана санымызды соғып, көңіл бөлген ісіміздің кері тартқанын кеш байқаймыз. Басқа мәселеде бұл жағдай кешірімді болар. Бірақ, бала тәрбиесінде мұндай қателікке ұрыну, кемшілікке жол беру – болашағымызды балталаумен бірдей.
Ең алғаш кәсіпкерлікке қадам басқанда бағытымды осы салаға бұруымның басты себебі де содан болатын. Әкеден алған темірдей тәлім, анадан көрген айнымас тәрибенің арқасы болар бала болашағына әсер ететін жобалар жасасам деген арманымды ақиқатқа айналдырдым. Тәңір қолдаған әрбір бастамам жемісті болып, қаншама балған бүлдіршін үлкен өмірге деген алғашқы қадамдарын біздің мекемелерден басты. Өзім туып өскен Ақтөбе облысында 10 балабақша ашып, ел қолдауына ие болдық. Барлық балабақшаны сол кездегі облыс әкімі Сапарбаев Бердібек Мәшбекұлы ашып, сәттілік тілеген еді.
Жәй ғана аты бар, заты көруге тұрарлықсыз кәсіп жасау – менің өмірлік қағидамның тармағында жоқ түсінік. Содан болар, әр балабақшаның талапқа сай болуын жіті қадағалап, әр бөлмесінің безендірілуіне дейін өз бақылауымда ұстадым. Бастысы дұрыс тәрбие беріп, лайықты білім алуына негіз қалауға атсалысып келеміз. Оларды салауатты өмір салтын ұстануға үйрету, көркөмөнерге баулу жұмыстары да да алғашқы орында.
Елдің Батыс өңірінен бастау алған балабақша ашу ісі қасиетті Түркістан төрінде жалғасты. «Айтулы Тілеу Батыр» мектеп-балабақшасының бүгінгі әлеуеті қала тұрғындарының көз алдында өтуде.
Қазіргі таңда, ел бойынша 2 мыңға жуық баланың мектеп-балабақшамен, 586 азаматтың тұрақты жұмыспен қамтылуына себепкер болғаным үшін өзімді бақытты сезінемін. Бұл сандардың күн санап артып жатқаны менің және біздің ұжымның жұмысына шабыт беріп, қанаттандырып келеді.
Елдің, әрбіріміздің болашағымыз саналатын балалар үшін әр азамат өз деңгейінде, ұлттық тәрбие шеңберінде аянбай еңбектенуі керек екендігіне күн сайын көзім жетіп келеді.
Дәулеталина Сәуле Меңдіғұллақызы,
«Медина» қоғамдық бірлестігінің төрайымы
