Мемлекет Басшысы Қ.К.Тоқаев: “Барлық деңгейдегі әкiмдер жыл бойы халықпен кездесулер өткізсiн. Кездесулер барысында халықты толғандыратын әлеуметтік мәселелерге баса назар аудара отырып, проблемалық мәселелерді шешудiң жолдары мен мерзімдерін түсіндірсiн,”-деп әкiмдерге тапсырма берген болатын.Осы орайда Президент Жарлығына сәйкес бүгін аудан әкімі Арман Сәбитов Қарамұрт ауылдық округінің тұрғындарымен кездесті. Алдымен ауылдық округінің әкімі М.Нажиев тарапынан ағымдағы екінші тоқсанында өткен кездесудің қорытындысы көпшілікке таныстырылды. Кейінгі кезекте бірнеше салаға қатысты маңызды мәселелер көтеріліп, шешу жолдары талқыланды. Айта кетелік, қарамұрттықтар елді мекен тұрғындарын газ және электр жарығымен тұрақты қамтамасыз ету, мектептің тозығы жетуіне байланысты жаңа ғимарат салу, балаларды ыстық тамақпен қамту, тұрғын үй құрылысы үшін жер кезегінде тұрған азаматтарға жер учаскелерін қарастыру секілді қажеттіліктерін жеткізді. Аталған ұсыныс-пікірлер тыңдалған соң, аудан басшысы және тиісті сала басшылары түсіндірмелерін берді. Атап айтқанда, жаңақұрылыс аумақтарындағы тұрғын үй құрылыстары үшін жоспарланған жер учаскелеріне инфрақұрылым жүйелері толық жүргізілмей, заң талаптарына сәйкес мұндай жер учаскелері халыққа таратылмауы тиіс. Келесі кезекте алдағы оқу жылында оқушыларға ыстық тамақ қаралған, осыған байланысты қазіргі таңда аудан бойынша қамтылатын нақты бала саны анықталуда. Коммуналдық жүйелерді ретке келтіру және сапасын жақсарту бағытында жұмыстар жалғастырылатын болады. Жергілікті тұтынушылар көгілдір отынды үзіліссіз жеткізе алатын «Қарамұрт газ» немесе өзге де газ шаруашылығымен айналысатын мекеменің бірін таңдап, қысқа дайындық мерзімінен кешіктірілмей, бір келісімге келу керектігі ескертілді.
Кездесу соңында ақсақал ақ батасын берді. Басқосудан кейін, аудан басшысы ауылдық мәдениет үйінде тұрғындарды жеке мәселелері бойынша қабылдады. Қойылған сұрақтарға жауаптар ұсынылып, бақылауға алынды. Олардың ішінде Ш.Мирзалиев және Жамбыл көшелеріндегі ескі электр бағанарын ауыстыру, ауыл шаруашылығына арналған минералды көпкомпонентті тыңайтқыштарды өндіру бойынша жобаны қолдау үшін жер телімін бөлу, «ОҚО Сайрам ауданының Қарамұрт ауылдық округінде «Қызылсай» су қоймасын салу» жобасын қаржыландыру жөнінде өтініштер айтылды.
Одан бөлек, аудан әкімі Арман Сәбитов Қарамұрт ауылдық округінің тұрғындарымен кездесуін ауылдық мәдениет үйінде өткізді. Жиында ауылдық округінің әкімі Мамуржан Нажиев қарамұрттықтармен 2023 жылдың ІІ тоқсанында өткен кездесуде көтерілген 6 мәселенің орындалу барысын таныстырды. Олардың ішінде бірі орындалған, қалғандары тұрақты бақылауда. Атап айтқанда, “Кент-Балдыберек” каналы асар жолымен тазаланды. Одан бөлек, өрт сөндіру бөлімшесін ашу, 3 көшеге жасанды жол кедергілері мен жол белгілерін орнату, 1 көшенің жолын және учаскелік дәрігерлік пунктінің ғимаратын жөндеуден өткізу, электр бағаналарын ауыстыру мәселелерінің шешу жолдары алдағы уақытта қарастырылатын болады. Аудандық мәслихаттың төрағасы Шамхат Халмурадов, халық қалаулылары, аудан әкімінің орынбасары Шухратулла Убайдуллаев, аудандық ардагерлер кеңесінің төрағасы І.Айтжан, жергілікті мекеме-ұйым басшылары және тұрғындар қатысып отыр.
Сұрақ-жауап кезегіне өтіп, белсенділер көкейлеріндегі мәселелерін жеткізіп, жауаптарын алуда.
Аудан әкімі Арман Сәбитовтің жеке қабылдау кестесіне сәйкес, аудан тұрғындарын қабылдады. Ауылдық округтерінен келген азаматтар жерді заңдастыру, кіші және орта кәсіпкерлікті қолдау, мектептің тозығы жетуіне байланысты қосымша ғимарат салу, санитарлық тазалықты сақтау, инфрақұрылым және коммуналдық жүйелермен қамтамасыз ету секілді талап-өтініштерін жеткізді. Аудан басшысы аталған мәселелердің кезең-кезеңімен, заңға сәйкес шешімін табу үшін белгілі бір уақытты талап етілетінін, сонымен қатар қаржы көзін қарастырудың қажеттілігі болатынын түсіндірді. Қабылдау барысында тұрғындардан тыңдалған ұсыныс-пікірлер бақылауға алынып, сала басшылары мен тиісті ауылдық округтерінің әкімдеріне зерделеуге, нақты жұмыстарды атқаруға тапсырылды.
