Сарыағаш ауданына қарасты Қанағат елді мекенінде «Ауыл–ел бесігі» бағдарламасы аясында салынған 150 орындық мәдениет үйі мен кітапхана пайдалануға берілді. Ашылу рәсіміне аудан әкімі Арман Абдуллаев,Түркістан облыстық мәслихат депутаттары Алмас Салимов, Жомарт Әбдібаев, аудандық мәслихаттың төрағасы Рысбек Асылбекұлы мен ауыл ақсақалдары мен тұрғындары қатысып, кітапхана мен мәдениет үйінің лентасын салтанатты түрде қиды.
– Мемлекет басшысы Қасым-Жомарт Кемелұлы ауылдың әлеуметтік жағдайын көтеру мақсатында «Ауыл-ел бесігі» бағдарламасын қолға алған болатын. Сол бағдарлама аясында ашылғалы отырған 150 орындық мәдениет үйі мен кітапхананы бүгін ел игілігіне табыстағалы отырмыз. Ашылып жатқан ғимарат құтты болып, қуанышымыз ұзағынан болсын. Мәдениет үйінде біздің жастарымыз мәдени шараларды өткізіп, еліміздің, облысымыздың атын шығаратын, елдің мәдениетіне үлес қосатын жастарымыз көбейе берсін!- деді өңір басшысы.
Мәдениет үйі мен кітапхананың құрылысын жүргізу үшін республикалық бюджеттен қаржы қаралып, заманауи үлгіде екі қабатты ғимарат салынды. Заманауи үлгідегі нысанның ішінде 150 орындық концерттік залы, екі кітапхана залы, түрлі үйірме жұмыс істейді. Кітапхана қорында 2 мыңнан астам кітап бар.
