Мемлекет басшысы Қасым-Жомарт Тоқаевтың «Әкімдердің халықпен кездесулерін өткізу туралы» Жарлығына сәйкес аудан әкімдері халықпен кездесулерін жалғастыруда. Президенттің тапсырмасына сәйкес, Сарыағаш ауданының әкімі Арман Абдуллаев Дербісек ауылдық округі, Дербісек елдімекені, сондай-ақ Қабланбек ауылдық округі Ақниет елдімекеніне барып, ауызсу қоймаларындағы құрылыс жұмыстарының жағдайымен танысып, сапасын тексерді.
Сонымен қатар, аудан басшысы су құбыры өтіп жатқан аталған елдімекендердің көшелерін арнайы аралап, жөндеу жұмыстарын бақылады. Бүгінгі таңда, аталған су қоймаларының қалыптары құйылып, бетін жабу кезеңіне дайындық жұмыстары жүргізіліп жатыр. Құрылыс монтаж жұмыстарының 70 пайызы орындалып, жыл соңына дейін аяқталмақ. Құрылыс нысандарында болған аудан басшысы ел игілігіне бағытталған істер сапалы әрі өз уақытында жүргізілуі тиістігін айтты. Сондай-ақ бүгінгі күнге дейін атқарылған құрылыс жұмыстарының жағдайын саралай отырып, жауапты мердігер мекеме басшыларына алдағы уақытта құрылыс жұмыстарының барысын арнайы өзі келіп қадағалап тұратынын жеткізді. Еске сала кетсек, аудандағы 68 елдімекеннің 42-сі, яғни 61,8%-ы орталықтандырылған ауызсумен қамтылған. Аймақты табиғи газбен қамту көрсеткіші қазіргі таңда 76,1 пайызды құрайды. Сапалы электрмен қамту бойынша өткен жылы жалпы 18,3 шақырым электр желілері, 1043 электр бағаналары, 15 дана трансформатор орнату жұмыстары жүргізілген.
Сонымен қатар, аудан әкімі Арман Абдуллаев Ақжар ауылдық округінің тұрғындарымен кездесіп, өзекті мәселелері мен ұсыныстарын тыңдады. Аудан басшысы наурыз айында кездесу барысында, баяндаған жоспарлары бойынша атқарылып жатқан жұмыстарды баяндап өтті. Айта кетсек, Бағыс елді мекеніндегі №23 Ғ.Мұратбаев атындағы 300 орындық мектеп құрылысы, ішкі көшелерді асфальттау, Бағыс елді мекеніндегі 4G мобильді интернеттің жылдамдығын жоғарылату және ауыз сумен қамтамасыз ету қазіргі таңда өзекті мәселелер болып келеді. Кездесу барысында ауыл тұрғындары тұрғын үй салу үшін жер учаскесін беру, таза ауыз сумен қамтамасыз ету, асфальт жол салу, жұмыспен қамту, қашыртқыларды тазалау, игерілмей жатқан жерлерді қайтару туралы өтініштері мен пікірлерін айтты. Аудан әкімі Арман Абдуллаев тұрғындар көтерген мәселелердің әрбіріне жеке-жеке тоқталып, мәселелердің шешілу жолдарын қарастырып, заңға сәйкес тиісті жауап берді. Кездесуден кейін, аудан басшысы ауыл тұрғындарын жеке қабылдады. Қабылдауға келген тұрғындар жарықтандыру мәселесін көтерді. Аудан басшысы ауыл тұрғындарын қабылдау барысында ауыл әкімі мен тиісті мекеме басшыларына өтініштерді назарға алып, заңға сәйкес оң шешуді тапсырды.
Тұрғындармен кездесу дербісек ауылдық округінде жалғасып, ұсыныстары тыңдалды.Аудан әкімі Арман Абдуллаев тұрғындармен кездесудің ІІ тоқсанын Дербісек ауылдық округінің тұрғындарымен кездесумен жалғастырды. Аудан басшысы Дербісек ауылдық округі тұрғындарының ұсыныстары мен өтініштерін тыңдады.
Кездесу барысында аудан басшысы наурыз айында баяндаған жоспарлары бойынша атқарылып жатқан жұмыстарын айтып өтті. Қазіргі таңда, Дербісек елді мекенінде ауыз сумен жабдықтау жүйелерінің құрылысы, жер танабын жеке тұрғын үй құрылысы үшін жер учаскесі кезегіндегі тұрғындарға беру, ауылдық округі аумағынан елді мекен шегіне енген жерден «Жайлы мектеп» құрылысын жүргізу үшін жер телімін ажырату мәселелері.
– Бүгін өздеріңізбен жүздесіп, маңызды мәселелерді бірге талқылау үшін арнайы келіп отырмын. Мақсат – талаптарыңыз бен ұсыныстарыңызды тыңдау. Сіздердің әрбір өтініштеріңіз назарға алынып, алдағы уақытта бюджеттің мүмкіндігіне қарай тиісті жұмыстар атқарылатын болады, – деді аудан басшысы Арман Абдуллаев.
Кездесуде ауыл тұрғындары тарапынан аудан басшысына жарықтандыру, таза ауыз сумен қамтамасыз ету, ағын су, мектепті күрделі жөндеуден өткізу, тұрғын үй салу үшін жер учаскесін беру, қашыртқыларды тазалау,көшелерді жарықтандыру мәселелері бойынша сұрақтар қойылып, заң аясында тиісті жауаптар берілді.
Кездесуден кейін, аудан басшысы тұрғындарды жеке мәселелерімен қабылдап, өтініштерін тыңдап, заң аясында жауап берді. Аудан әкімі Арман Абдуллаев тұрғындар тарапынан көтерілген әрбір мәселе назарға алынып, кезең-кезеңімен шешілу жолдары қарастырылып, алдағы уақытта заңға сәйкес тиісті жұмыстар атқарылатынын жеткізді.
Аудан әкімі Арман Абдуллаевтың Дербісек ауылдық округіне іс-сапары барысында, жаңадан заманауи үлгіде салынып жатқан жекеменшік білім беру мектебінің құрылыс жұмыстарымен танысты.
«Ауданымызда жыл санап жекеменшік зияткерлік мектептер саны артуда. Бұл көзқуантарлық жағдай. Бұл өз кезегінде мектептердегі білім сапасының артуының кепілі», – деді құрылыс нысанында болған аудан басшысы Арман Абдуллаев . Құрылыс жұмыстарымен таныстырған жеке кәсіпкер аудан әкіміне балаларға қажетті жағдай жасалатыны, сонымен қатар құрылыс нормаларына сәйкес жұмыстар жүргізілетінін айтып өтті. Айта кетсек, жеке меншік мектептің құрылысы ағысдағы жылдың соңына дейін аяқталу жоспарлануда. Сондай-ақ, мектепте оқушылардың күні бойы мектепте сабақ оқуына, үй тапсырмаларын орындауына және үйірмелерге қатысуына жағдай қарастырылған.
Сонымен қатар, Арман Абдуллаев тұрғындармен кездесудің ІІ тоқсанын Жемісті ауылдық округінің тұрғындарымен жалғастырды.Тұрғындардың өзекті мәселелері мен ұсыныстарын тыңдады.
-Бүгін өздеріңізбен жүздесіп, маңызды мәселелерді бірге талқылау үшін арнайы келіп отырмын. Сіздерге осы есепті кездесуге өз уақыттарыңызды бөліп келгендеріңізге алғыс айтамын.Ең алдымен істелген жұмыстарды саралап, жоспарларды талқылаймыз.Жергілікті биліктің ең басты мақсаты – тұрғындардың өмір сүруіне қолайлы жағдай жасау және өңірдің әлеуметтік-экономикалық дамуын қамтамасыз ету,-дей отыра, аудан басшысы наурыз айындағы кездесу барысында ,баяндаған жоспарлары бойынша атқарылып жатқан жұмыстарды айтып өтті.
Айта кетсек, елдімекен көшелеріне электр бағаналарын қойып, электр желісін тарту және трансформатор құрылысын жүргізуге, елді мекені орталығында орналасқан ауыз су ұңғыма айналасын қоршау, Тың елді мекенінде интернет жылдамдығын көтеру мәселелері бойынша атқарылған жұмыстарды баяндап өтті.
Кездесу барысында ауыл тұрғындары тұрғын үй салу үшін жер учаскесін беру, ауыз су құбырларын ауыстыру,дәрігерлік емхана салу,ауыз су тарифін бағасын төмендету мәселелері талқыланды. Аудан әкімі Арман Абдуллаев тұрғындар көтерген мәселелердің әрбіріне жеке-жеке тоқталып, мәселелердің шешілу жолдарын қарастырып, заңға сәйкес тиісті жауап берді.
Одан бөлек, аудан әкімі Арман Абдуллаев Жібек жолы ауылдық округі, Дихан баба елді мекеніндегі 200 орындық Мәдениет үйінің құрылыс жұмыстарының сапасымен танысты.
Құрылыс жұмыстарын аралап көрген аудан басшысы, бүгінгі күнге дейін атқарылған жұмыстарын жағдайын саралай отырып, жауапты мердігер мекеме өкіліне жұмысты жүйелеп жандандыруды тапсырды. Бүгінгі таңда, нысанның іргетасы қаланып, ғимараттың шатыры жабылып, есік- терезелері де, орналастырылған. Сонымен қатар, нысанның ішкі және сыртқы әрлеу, кәріз жүйесі, жылу жүйесі, көрермендер залының құрылыс жұмыстары жүргізілуде. Мәдениет үйі – адамға ізгілік дәнін сеуіп, өнерді сүюге тәрбиелейтін мәдени кешен. Қоғамда Мәдениет үйінің алатын орны бөлек.
Ауылдарда Мәдениет үйлерін көбейту арқылы ауыл мәдениеті өркендейді. Ауыл – ұлттың қаймағы, ұйытқысы. Еліміздің даңқын асырып жүрген таланттардың көбі ауылдан шықты. Ауылдың өнері өркен жайса, қазақтың мәдениеті қанатын кең жаяды.
Бұдан бөлек, аудан әкімі Арман Абдуллаев тұрғындармен кездесудің ІІ тоқсанын Жібек жолы ауылдық округінің тұрғындарымен жүздесіп,өзекті мәселелері мен ұсыныстарын тыңдады. Аудан басшысы Арман Абдуллаев наурыз айында өткен кездесу барысында, көтерілген мәселелер бойынша атқарылып жатқан жұмыстарды және алдағы жоспарларды баяндап өтті. Айта кетсек, Жаңақұрылыс елді мекеніндегі орталық көшеге жаяу жүргіншілер жолын салуға мен жарық шамдарын орнату, Қарабау елді мекеніндегі ішкі көшелерді асфальттау, табиғи газ кіргізуге, асфальт төсеу өзекті мәселелері тұрғындар көтерген болатын. Қазіргі таңда, аталған мәселелер оң шешімін тауып,атқарылу үстінде екенін айтып өтті аудан басшысы Арман Абдуллаев.
Кездесуден кейін, аудан басшысы тұрғындарды жеке мәселелерімен қабылдап, өтініштерін тыңдап, заң аясында жауап берді. Аудан әкімі Арман Абдуллаев тұрғындар тарапынан көтерілген әрбір мәселе назарға алынып, кезең-кезеңімен шешілу жолдары қарастырылып, алдағы уақытта заңға сәйкес тиісті жұмыстар атқарылатынын жеткізді.
Бүгінгі таңда аудан аумағындағы игілікті істер қатары толыға түсуде. Соның бірі – Тегісшіл ауылдық округі, Мәдениет елді мекенінде жаңадан бой көтерген еңселі қақпаның салтанатты түрде ашылуы болып өтті. Осындай игі істердің жалғасы болған қақпаның ашылу салтанатына аудан әкімі Арман Абдуллаев, ауыл тұрғындары қатысты.
– Ауылдың жергілікті тұрғындарының және демеушілердің қолдауымен бой көтерген айшықты қақпаның ашылуымен шын жүректен құттықтаймын. Бірлесе істеген жұмыста қашанда береке бар. Ауылды алтын бесік санап, игілікті іс атқарған, осы істің басы-қасында жүрген атпал азаматтардың еңбегінен өзгелер үлгі алатын болады», – деп аудан әкімі Арман Абдуллаев ізгі тілегін жеткізіп, қақпаның қызыл лентасын қиып,арнайы ашып берді.
Айтулы іс-шара барысында ақ жаулықты аналар шашу шашып, ақсақалды қариялар баталарын берді.Бірлігі мен ынтымағы жарасқан Тегісшіл ауылдық округінде жасалынып жатқан істер – ауылдың дамуы үшін атқарылып жатқан тірліктер.
Сондықтан ауыл келбетін көркейтуге үлес қосқан азаматтардың өнегелі ісінен кейінгі ұрпақ үлгі болатыны сөзсіз.
Бүгінде аудан әкімі Арман Абдуллаев Тегісшіл ауылдық округі, Мәдениет елді мекеніндегі күрделі жөндеу жұмыстары жүргізіліп, ел игілігіне қайта падалануға берілген фельдшерлік-акушерлік пунктінде болып, медициналық мекеменің тыныс-тіршілігімен танысты. Мәдениет ауылдық фельдшерлік-акушерлік пунктінің аға дәрігері Ж.Сүлейменова аталған мекемеде ыстық су, ғимараттың іші жылы әрі жарық екенін, баяндап өтті. Бүгінгі таңда, аталған пункт 1700-ге жуық ауыл тұрғынына медициналық қызмет көрсетуде. Айта кетсек, фельдшерлік-акушерлік пунктінің күрделі жөндеу жұмыстары ағымдағы жылдың 1 мамыр айында басталған болатын. Қәзіргі таңда, сыртқы келбеті жаңартылып, екпе кабинеттері де, қалыпқа келтіріліп, толығымен жөндеу жұмыстары аяқталып пайдалануға берілген. Бүгінгі таңда медициналық мекемеде үш дәрігер маман қызмет атқаруда. Сондай-ақ, аудан басшысы Арман Абдуллаев Сарыағаш қаласының тұрғындарымен көтерілген өзекті мәселелерді шешу жолдарын нақтылау мақсатында арнайы жұмысшы топпен барды.Тұрғындармен кездесу барысында су шаруашылығы мамандарымен кеңесе отырып, су сызаттарын тоқтату мәселесі талқыланды. Өз кезегінде, құбырлы дренаж жүйесін салу және су қашыртқысын механикалық тазалау бойынша шешім қабылданды. Осы орайда, аудан басшысы Арман Абдуллаев жоғарыдағы мәселелерді шешуге байланысты, сметалық құжаттарды әзірлеу жөнінде жауапты мекеме басшыларына тапсырма берді. Тұрғындардың әрбір мәселесі аудан басшысының назарында. Сонымен қатар, Арман Абдуллаев Сарыағаш қаласының орталығында орналасқан базарлар маңындағы түйіткілді мәселелерді шешу мақсатында, аудандық бөлім басшылары, қала әкімі, аудандық төтенше жағдайлар мен полиция бөлімдерінің басшылығының басын қосып, базар маңын арнайы барып, аралады. Аумақтағы өзекті мәселелердің бірі көлік кептелісін болдырмау жөнінде аппарат басшысы О.Ыбрайдың, қала әкімі М.Доспуловтың және аудандық полиция бөлімінің өкілінің ұсыныстары тыңдалып, оны іске асыру үшін тиісті шаралар қарау бойынша тапсырма берілді.
Сонымен қатар, аталған аумақтағы заңсыз сауда мен тазалық мәселелері көтерілді. Аудан басшысы заңсыз сауда жасаушылардың жол жиектерінде орналасып, жаяу жүргіншілер мен көлік қозғалысына кері әсерін тиігізіп отырғандығын алға тартып, қала әкімдігіне аудандық полиция бөлімі басшылығымен бірлесіп осы мәселе бойынша шешу шараларын шұғыл қабылдау қажеттігін ескертті. Тазалық мәселесі жөнінде қала әкіміне де, біршама тапсырмалар берілді, оның ішінде базар аумағын таза ұстап, санитарлы нормаға сәйкес сақталуы жөнінде базар басшыларына түсіндіру жұмыстарын жүргізу қажеттігін ескертті. Мәселелерді шешу жолында тиісті мекемелер өзара тығыз байланыста болып, ең тиімді шешімдерді қабылдау қажет екендігін аудан басшысы Арман Абдуллаев жеткізді.
Аудан әкімі Арман Абдуллаев және Сарыағаш қаласының әкімі Мұхит Доспулов қаланы дамыту жоспарына сәйкес жүргізіліп жатқан абаттандыру және көгалдандыру жұмыстарына арнайы барып,мән-жайымен танысты. Аудан басшысы қала аумағын аралау барысында абаттандыру, жасыл екпелерді суғару жұмыстарының барысын бақылады. Жауапты мердігер тарапынан жүргізіліп отырған абаттандыру жұмыстарын күшейту, жасыл екпелерді суғару жұмыстарын тұрақты жүргізу қажеттігін ескертіп қала әкімі М.Доспуловқа бірқатар тапсырмалар жүктеді. Сонымен қатар, аудан басшысы Арман Абдуллаев Ақжар ауылдық округі, Бағыс елді мекеніне арнайы барып, 300 орындық №23 Ғ.Мұратбаев атындағы жалпы орта мектебінің құрылыс жұмыстарының мән-жайымен танысты. Қазіргі таңда нысанның ішкі монтаж жұмыстары жүргізілуде. Мердігер мекеме өкілі жасалып жатқан жұмыстың жай-күйін аудан басшысына баяндады. Құрылыс жұмыстарымен танысқан аудан басшысы мердігер мекеме өкіліне жылыту жүйесін көмірден газға ауыстыру және оны қосу жөнінде жұмыстар жүргізілуі қажет екенін атап өтті. Сондай-ақ , аталған ғимарат балалардың болашағы үшін бой көтеріліп жатқан білім ордасы болғандықтан бірінші кезекте сапалы болуы қажеттігін ескертіп, жаңа оқу жылына дейін аяқтауды тапсырды.
