Жаңа жыл мерекесі қарсаңында Сарыағаш ауданына қарасты екі елдІ мекенде «Ауылдық денсаулық сақтауды жаңғырту» ұлттық жобасы аясында фельдшерлік акушерлік пункттері халық игілігіне пайдалануға берілді.
Жібек жолы ауылдық округі, Қарабау елді мекенінде салынған фельдшерлік акушерлік пунктінің ашылу салтанатына аудан әкімі Арман Абдуллаев,Түркістан облыстық мәслихатының депутаттары Алмас Салимов, Жомарт Әбдібаев, аудандық мәслихаттың төрағасы Рысбек Асылбекұлы мен ауыл тұрғындары қатысып, лентасын қиды.
-Жыл сайын аудан бойынша игі істер атқарылуда. Бүгінде осындай қуаныштың куәсі болып отырмыз. Мемлекет денсаулық сақтау саласына әрқашан айрықша назар аударады. Біз үшін ең бастысы-адамның өмірі мен денсаулығы. Енді тұрғындар орталыққа бармай-ақ, алғашқы медициналық көмекті осы медициналық мекемеден алатын болады. Бұл фельдшерлік акушерлік пунктер сіздерге тек аурудың алдын алу үшін қызмет етуіне тілектеспін,-деді аудан басшысы.
Келесі кезекте , Жылға ауылдық округіне қарасты Шымырбай елді мекенінде бой көтерген фельдшерлік акушерлік пунктінің ашылу рәсімі өтіп, лентасы қиылды.
Салтанатты шара барысында қуаныштарын бөлісуге келген сала басшыларына ауыл тұрғындары өз ризашылықтарын білдіріп, ақсақалдар ақ баталарын берді.
Аталған фельдшерлік акушерлік пункттер жергілікті тұрғындардың денсаулығын сақтау және медициналық қызметтің қолжетімділігін арттыру мақсатында ашылған. Ғимаратта учаскелік дәрігер бөлмесі, физиотерапиялық ем қабылдау, акушерлік пункт, тіркеу және егу бөлмесі сияқты бірнеше кабинеттермен жабдықталған.
Ауыл тұрғындарын тұрақты жұмыспен қамтып, тұрғындардың денсаулығын жақсарту, алдын алу шараларын жүзеге асыру мен уақытылы көмек көрсету бойынша маңызды рөл атқармақ.
