Сарыағаш ауданына қарасты Жартытөбе ауылдық округінде «Ауыл ел-бесігі» бағдарламасы аясында заманауи спорт кешені ашылды. Спорт кешенінің ашылу салтанатына аудан әкімі Арман Абдуллаев, аудандық мәслихаттың төрағасы Рысбек Асылбекұлы, зиялы қауым өкілдері, жас спортшылар мен ауыл тұрғындары қатысты.
Жас спортшыларымыздың қуанышына айналған кешеннің ашылу салтанатында аудан әкімі Арман Абдуллаев құттықтау сөз сөйлеп, барша ауыл тұрғындарына ізгі тілегін жеткізді.
-Алдымен баршаңызды келе жатқан Жаңа жыл мерекесімен құттықтаймын. Президентіміз Ұлт денсаулығын нығайту жолында бұқаралық спортты дамытуды және тұрғындардың спортпен еркін шұғылдануына барынша жағдай жасау қажеттігін атап өткен болатын. Осы ретте, мемлекет тарапынан спорт саласын дамытуға көптеп көңіл бөлінуде. Еліміздің жігерлі жастарын дайындайтын жаңа спорт кешені құтты болсын. Үлкен спорттық кешен халық игілігі үшін қызмет етсін,-деді Арман Абдуллаев.
Салтанатты шара барысында құрылыс жұмыстарын жүргізген «КДСМ» мекемесі Жартытөбе ауылды округ әкімі Абай Ашировке ғимараттың кілтін табыстады.
Құрама елді мекеніндегі жаңа спорт ғимаратының құрылысы «КДСМ» ЖШС-і тарапынан жүргізілген. Спорт кешенінде волейбол, баскетбол, футзал, қол добы,күрес, бокс, дзюдо және басқа да жаттығу залдары және үстел теннисі бар. Бір уақытта 100-ден астам ауыл тұрғыны спортпен шұғылдануына барлық жағдай жасалған.
