Жаңа жыл қарсаңында Сарыағаш ауданына қарасты Жылға елді мекенінде ауыз су қоймасының құрылыс жұмыстары аяқталып, тұрғын үйлер ауыз сумен қамтылды. Салтанатты шараға аудан әкімі Арман Абдуллаев, аудандық мәслихат төрағасы Рысбек Асылбекұлы ауыл ақсақалдары мен ауыл тұрғындары қатысты.
-Құрметті жерлестер, мемлекет басшысы Қасым-Жомарт Тоқаевтың халыққа Жолдауында ауылдық елді мекендерді дамыту, тұрғындардың өмір сапасын жақсарту бойынша берілген тапсырмасына сәйкес Сарыағаш ауданында ауқымды жұмыстар атқарылуда. Осы орайда, бүгін ауыл халқы сапалы ауыз сумен қамтылып отыр. Барша ауыл тұрғындарын жылдап күткен таза ауыз судың әрбір тұрғынның ауласына жеткізілгендігімен құттықтаймын,-деді Арман Абдуллаев.
Құрылыс жұмыстары «Отау Строй» ЖШС-і мекемесі тарапынан жүргізілді. Жобаға сәйкес 104,1 шақырым ұзындықта су құбыры жүргізіліп, 1000-ға жуық тұрғын үй ауыз сумен қамтылды. Құрылыс нысанында 700 м су ұңғымасы қазылып, 1-ші көтеру, 2-ші көтеру сорғы станциясы ғимараты салынып, ішкі жүйе ауыз су құбырлары және сыртқы қоршау жұмыстары жүргізілген.
Аудан әкімі жауапты мамандарға жаңа нысанды күтіп ұстап, ауылды сумен үзіліссіз қамтамасыз етуді тапсырды.
Сарыағаш ауданы әкімінің баспасөз қызметі
