Мемлекет басшысының тапсырмасыны сәйкес өңірдегі ауыл шаруашылығы саласының даму қарқынын жеделдету үшін ірі инвесторларды тарту жұмыстарын жандандыру үшін қарқынды жұмыстар жүргізілуде.
Жуырда ғана Сарыағаш ауданының әкімі Арман Айдарұлы қалада спорт кешенін салу мақсатында инвесторлар тарту мәселесін қозғаған болатын. Ол жиында қоғамдық кеңес мүшесі М.Асилов, Сарыағаш қаласының әкімі М.Доспулов, Дарбаза ауылдық округінің әкімі Б.Ауезов, аудандық жер қатынастары бөлімінің басшысы Н.Кукеев, аудандық мәдениет, тілдерді дамыту, дене шынықтыру және спорт бөлімінің маманы Н.Ахментаев қатысты. Аудан жастарына жақсы жағдай жасау мақсатында бірқатар жобалар қаралды. Аталған кездесуде спорт кешенін салуға инвестор тарту мәселесі жан-жақты талқыланып, шешу жолдары қарастырылды. М.Асилов спорт кешенін салуға инвестор болуға келісім берген азаматтардың бар екендігін айтып, спорт кешенінің дайын жобасымен таныстырды. Жоба бойынша спорт кешенінде заман талабына сай жатақхана, асхана, спортпен шұғылдануға арналған арнайы зал қарастырылған. Спорт кешенінің жобасымен танысқан аудан әкімі қала әкімі мен аудандық жер қатынастары бөлімінің басшысына спорт кешеніне арнайы жерді заңдастырып беруді тапсырды.
Айта кетсек, ауданға инвесторлар тартылып, жаңа нысандардың ашылуы аудан бюджетінің ұлғаюына алып келеді. Сонымен қатар, ашылған нысандарда жергілікті тұрғындар жұмыспен қамтылып, жұмыссыз мәселесін шешуге де өз септігін тигізеді.
Бүгін аудан әкімі Арман Абдуллаев ауданға инвестиция тарту мәселесі бойынша инвесторлармен кездесті. Кездесу барысында «Келес Стройблок» ЖШС-нің өкілдері аудан әкіміне керамзит зауытының дайын бизнес жобасымен таныстырды. Айта кетсек, керамзит зауыты бүгінгі таңда Кентау қаласында өз жұмысын жүргізіп, өндірістік кәсіпкерліктің дамуына өз үлестерін қосуда.
Осыған орай, инвесторлар аудан аумағынан аталған зауыттың құрылысын бастауды ұсынып, арнайы бөлінген жерді заңдастыру бойынша ұсыныстарын жеткізді. Инвесторлармен тілдескен аудан басшысы Арман Абдуллаев аудандық жер қатынастары бөлімінің басшысына зауытқа бөлінген жерді заңдастыру жұмыстарын тездету бойынша арнайы тапсырма беріп, инвесторлардың алдағы жұмыстарына сәттілік тіледі. Сонымен қатар жалпы ел экономикасының мықтап нығаюына білім саласының маңызы зор. Осыған байланысты аудан басшысы Арман Абдуллаев Ақжар ауылдық округі, Бағыс елді мекеніне арнайы барып, 300 орындық №23 Ғ.Мұратбаев атындағы жалпы орта мектебінің құрылыс жұмыстарының сапасын бақылады.
Айта кетсек, қазіргі таңда нысанның іргетасы қаланып, ғимараттың шатыры жабылып, терезелері де орналастырылған.
-Аталған ғимарат балалардың болашағы үшін бой көтеріліп жатқан білім ордасы болғандықтан бірінші кезекте сапалы болуы қажет. Сол үшін мердігер мекеме жұмысшы күшін көбейтіп, нысанды сапалы және мерзімінде аяқтап, пайдалануға беру маңызды — деді аудан басшысы.
Келесі кезекте аудан әкімі Дарбаза ауылдық округі, Сарысу елді мекеніндегі 200 орындық №40 Н.Әбдіров мектебінің құрылыс жұмыстарымен танысты.
Мектептің құрылыс жұмыстарымен танысқан аудан әкімі қазаншұңқыр топырағын нығыздау жұмыстарының сапасы күмән тудыруына байланысты геологиялық сараптама қорытындысын қайта алғанша құрылыс жұмыстарын тоқтатуға ұсыныс берді.
Биыл ауылдарға ерекше көңіл бөлініп, қолдау көрсету жылы саналады. Осы мәселе төңірегінде аудан басшысы Арман Абдуллаев Құркелес ауылдық ауылдық округіне қарасты Бесқұдық елді мекеніне арнайы барып, ауылдың жағдайымен танысты. Елді мекен тұрғындарымен жүздескен аудан басшысына тұрғындар тарапынан тозығы жеткен электр бағаналарын ауыстыру және ауыз су құбырларын күрделі жөндеуден өткізу бойынша ұсыныс пікірлерін айтты. Мәселерді мұқият тыңдаған аудан басшысы, алдағы уақытта айтылған мәселелер бойынша зерделеу жұмыстары жүргізіліп, заңға сәйкес жұмыстар жүргізілетінін жеткізді. Аталған елді мекенде, құрылысқа қажетті -40, +40 градусқа төзімді табиғи тас өндіру кені орналасқан. Сондай-ақ, Арман Айдарұлы Жібек жолы ауылдық округі, Сөк-сөк елді мекеніне арнайы барып, тыныс-тіршілігімен танысты. Аталған елді мекендегі төрт түлікті бағуға арналған арнайы қораларды кеңейтіп, мал басын көбейтіп отырған шаруалармен кездесіп, мәселелердің мән-жәйін тыңдады.
— Елді мекенге арнайы өздеріңізбен жүздесуге келіп отырмын. Мақсатым ауылдың жәй-күйімен танысып, өздеріңізбен ашық сұқбат құрып, мәселеріңізді тыңдау. Елді мекенде атқарылатын жұмыс көп екенін көріп отырмын. Алдағы уақытта айтылған мәселелер жол картасына енгізіліп, кезең-кезеңімен шешілетін болады, — деді аудан басшысы.
Кездесу соңында тұрғындар аудан басшысына ризашылығын білдіріп, алдағы атқарар жұмыстарына сәттілік тіледі. Сонымен қатар, аудан әкімі Арман Айдарұлының жеке қабылдауына алдын ала жазылған 17 тұрғынның өтініштері мен ұсыныстары қаралды. Жеке қабылдауда тұрғындар тарапынан түрлі мәселелер қозғалды.
Дәлірек айтсақ, коммуналдық арендалық тұрғын үй беру, тұрақты жұмыспен қамту, кәсібін кеңейтуге жер беру, асфальт төсеу, тұрғын үй кезегі, тұрғын үй салу үшін жер учаскесін беру, тұйық жолды ашу, лоток қызу, құбыр қойдыру, таза ауыз сумен қамтамасыз ету мәселелері бойынша өтініштерін жеткізді.
Аудан басшысы қабылдауға келген азаматтар тарапынан айтылған арыз-шағымдар мен өтініштерін мұқият тыңдап, көтерілген мәселелерге қатысты заң аясында жауап берді.Сондай-ақ, жауапты дербес бөлім басшылары мен қала, кент және ауылдық округ әкімдеріне әрбір мәселеге талқылау жасап, шешу жолдарын қарастыруды тапсырды. Сондай-ақ, жеке қабылдауға келген тұрғынның денсаулығына байланысты өтінішін аудан әкімі 1-қабатқа түсіп, арнайы қабылдады. Қабылдауға келген тұрғын көпқабатты тұрғын үй кезегінде тұрғанын айтып, коммуналдық арендалық тұрғын үйден үй бөлуге көмек беруін өтінді.Аудан әкімі қабылдауға келген тұрғынға коммуналдық арендалық тұрғын үй заңға сәйкес кезектілік ретімен берілетінін түсіндірді. Бүгін аудан әкімі Арман Айдарұлы Сарыағаш қаласын абаттандыру және көгалдандыру жұмыстарын аралады. Келісім шарт негізінде «Сәулет 2012» ЖШС тарапынан атқарылып отырған абаттандыру жұмыстары бүгінгі таңда А-15 республикалық маңызы бар тас жолының бойындағы гүлзарлар арасын және орталық көше бойларын шөптерден тазарту жұмыстарымен жалғасын табуда.
Аралау барысында аудан әкімі М.Доспуловқа қала тазалығын үнемі бақылауда ұстауды және көшеттер отырғызу барысында аудан климатын ескеруді, жол бойындағы жасыл шарбақтарды сырлауды тапсырды. Сонымен қатар, жұмыс барысын жүйеге келтіріп кестеге сәйкес жұмысты жандандыруды міндеттеді. Қаланы абаттандыру және көгалдандыру жұмыстары аудан басшысының басты назарында.
Ауданда жол қызметі мен тасымал мәселесі бүгінде өзекті тақырып болып отыр. Соған байланысты аудан әкімі Арман Айдарұлы аудан аумағындағы және қала ішіндегі тұрақты бағыттарда жолаушылар мен багажды тасымалдау бойынша, аудан және қала тұрғындарына қызмет көрсетіп келе жатқан «Sar-avto» ЖШС-нің басшысы Д.Сүлейменовті арнайы қабылдады. Кездесу барысында аудан әкімі аудан аумағындағы қоғамдық көлік саласындағы өзекті мәселелерді көтеріп, жауапты тұлғаларға бірқатар тапсырмалар берді. Атап айтқанда, Сарыағаш қаласы ішіндегі тұрақты бағытта қатынайтын тозығы жеткен автобус көліктерін жаңалау мүмкіндіктерін жан-жақты қарастырып, мамыр айының басына дейін Д.Сүлейменов пен ауданның жолаушылар көлігі және автомобиль жолдары бөлімінің басшысы А.Жапбаровқа мәселені оң шешу бағытындағы ұсыныстарын есептерімен қоса ұсынуды тапсырды.
Айта кетсек, жоғарыда көтерілген мәселе өз шешімін тауып жатса, аудан тұрғындары тұрақты бағыттарда заманауи жаңа автобус көліктерін пайдаланатын болады.
Бұдан бөлек, биылғы жыл Түркістан облысына қарасты аудандарды толықтай абаттандыру жылы болып бекітілген. Яғни Сарыағаш қаласын абаттандыру және көгал жұмыстарының сапасымен аудан әкімі Арман Абдуллаев және Сарыағаш қаласының әкімі Мұхит Доспулов қаланы дамыту жоспарына сәйкес жүргізіліп жатқан абаттандыру және көгалдандыру жұмыстарына арнайы барып, аралап көрді. Аудан басшысы тұрғындар үшін қолайлы жағдайлар жасаудың маңызын айтып, қала аумағында гүлдер отырғызу, қураған ағаш бұталарды ретке келтіру, жол жиегіндегі ағаш қоршауларды ауыстыру, бордюрлерді жаңарту, жарықшам жүйелерін күтіп ұстау, көшеттерге суғару жүйелерін тарту жұмыстарымен танысты. Аралау барысында аудан әкімі М.Доспуловқа қала тазалығын үнемі бақылауда ұстауды және ағымдағы жылы қала аумағындағы орталық көшелердегі істен шыққан жарықшамдарды толығымен жаңартып, өзге де ішкі көшелердегі жарықшам жүйесінде орын алған ақаулықтарды ретке келтіруді ескертті. Сонымен қатар, абаттандыру және көгалдандыру жұмыстарын жүргізіп жатқан мердігер мекеме басшыларына жұмыстарды сапалы түрде белгіленген мерзімде аяқтауды тапсырып, қала әкіміне жұмысты ұдайы бақылауда ұстауды тапсырды.
— Қала аумағында жыл өткен сайын тұрғын үйлер саны көбейіп, құрылыс жұмыстары да қала тазалығына өз әсерін тигізіп отырғаны рас. Дегенмен біз қала тұрғындарының таза әрі әдемі табиғат аясында демалысын тиімді өткізулері үшін бар жағдайды жасауымыз қажет. Ол үшін көше бойларын абаттандыру керек. Қала тұрғындары мен сырттан келетін қонақтардың түнгі мезгілде де қауіпсіз жүруі үшін көше шамдарын уақтылы ауыстырып отыру керек. Қала тазалығын сақтау — тұрғындардың ортақ міндеті,-деді аудан басшысы.
Тұрғындардың түйткілді мәселелерінің бірі жайылымға арналған жер мәселесі. Осыған байланысты Көктерек кентінде барлау бақылау жұмыстары жүргізілген болатын. Жарты төбе ауылдық округіне қарасты Бостандық елді мекенінен Көктерек кентіне өткізілген егістік жерлерді мал жайылымына және көкпар шабатын алаң ретінде пайдалануға алу мақсатында ауыл тұрғындары өз арыз-шағымдарын жеткізген болатын. Осыған орай бүгін аудан әкімі Арман Абдуллаев орын алған жағдайды бақылауға алу үшін Көктерек кентіне арнайы барып, тұрғындармен кездесті. Мәселенің мән-жайын талқылап, аталған аумақты аралап көрді. Кездесуге аудан әкімінің орынбасары А.Қозыбаев, аудандық жер қатынастар бөлімінің басшысы Н.Кукеев, Көктерек кентінің әкімі У.Туржанова, аудандық полиция бөлімінің қызметкерлері қатысты. Аудан басшысы ауыл тұрғындарына аталған жер иеленушілеріне шығарылған қаулылар бойынша заң аясында зерделеу жұмыстарын жүргізіп, 10 күн ішінде бір шешімін айтатынын жеткізді.
Айта кетсек, ел әлеуетін көтеру, яки ел экономикасына өзіндік үлес қосу керек болса, ең әуелі өзгерісті аудан мәдениетінен бастаған жөн-ақ. Осы мәселеге қатысты аудан басшысы мәдениет және тілдерді дамыту, дене шынықтыру, спорт бөлімшелеріне барлау бақылау жұмыстарын жүргізген еді. Мемлекеттік қызмет істері агенттігінің Түркістан облысы бойынша департаментінің бастамасымен мемлекеттік көрсетілетін қызметтердің сапасын арттыру мақсатында «Атамекен-Қазақстан» қандастарға арналған қоғамдық қордың басшысы Ж.Т.Искакова мен Сарыағаш ауданы әкімі аппаратының ақпараттандыру және мемлекеттік қызмет көрсету мониторингі бөлімшесінің маманы ауданның мәдениет тілдерді дамыту, дене шынықтыру және спорт бөлімінің мемлекеттік қызмет көрсету сапасына қоғамдық бақылау жұмыстарын жүргізді. Бақылау кезінде, мемлекеттік қызмет көрсету жағдайымен танысып қызмет алушылардың өтініштерін қабылдаудың сапалы ұйымдастырылуы, мүмкіндігі шектеулі адамдардың мемлекеттік көрсетілетін қызметтерді алуы кезінде оларға қажетті жағдайлар жасалуы, көрсетілетін қызметті алушыларға мемлекеттік қызметтер көрсету тәртібі туралы қолжетімді нысанда толық және анық ақпарат ұсынылуын, өзіне-өзі қызмет көрсету бұрышының жай-күйі тексерілді. Алдағы уақытта да тұрғындарға тең мүмкіндік жасау, сапалы қызмет алуын жетілдіру мақсатында мемлекеттік қызметтер көрсетуші мекемелерге тұрақты түрде қоғамдық бақылау жұмыстары жүргізілетін болады.
