Сарыағаш қаласында өнімділігі тәулігіне 3400 текше метр сарқынды су тазартатын кәріздік тазарту кешенінің құрылыс жұмыстары аяқталып, ашылды. Ашылу салтанатында ғимараттың көк лентасын аудан әкімі Арман Абдуллаев, Түркістан облыстық мәслихатының депутаттары Алмас Салимов, Жомарт Әбдібаев, аудандық мәслихаттың төрағасы Рысбек Асылбекұлы, аудандық ардагерлер ұйымының төрағасы Мұстафа Сүлейменовтер қиып, нысанның жұмысымен танысты.
Ғимараттың құрылыс жұмыстарына республикалық бюджеттен қаражат бөлініп, «Сарыағаш Аман» ЖШС-і тарапынан жүргізілген. Жалпы кәріздік тазарту жүйесінің құрылыс жұмыстары ІІІ кезеңнен тұрады. Бүгінде, құрылыс жоспарына сәйкес І кезеңде 9 кәріздік сорғы стансасының сонымен қатар , ІІ кезеңде кәріздік тазарту кешенінің құрылысы аяқталды. Алдағы уақытта, ІІІ кезең – кәріздің ішкі желілерінің құрылысын жүргізу жоспарланған. Кешенде кәріз стансасы алаңы, су тазарту қондырғысы, өрт сөндіру резервуары бар. Бұл кешеннен өндірілетін техникалық су ауданның көгалдандыру бағытына пайдаланылатын болады.
Кәріздік тазарту қондырғысы тәулігіне 3400 текше метр су тазартуға қауқарлы. Кәріздік тазарту станциясы іске қосылған соң, сарқынды сулар экологиялық талаптарға сай тазартылып, өңірдің су ресурстарының сапасы жақсарып,қаланың санитарлық-эпидемиологиялық ахуалын жақсартады, сонымен қатар, жыл сайын жүздеген мың текше метр лас су тазартылып, жергілікті экологияға елеулі пайда әкеледі деп күтілуде. Мұндай жобалар өңірдегі су ресурстарын қорғау мен жергілікті халықтың денсаулығын сақтау үшін маңызды рөл атқарады.
