Сайрам ауданына қарасты Жібек жолы ауылында жасөспірімдер арасында бокстан облыстық ашық турнир өтті. Спорттық жарыс аудандық «Ақсу жекпе-жек спорт» клубының ұйымдастыруымен босктан халықаралық, республикалық, аудандық турнирлердің жеңімпазы Нұрсұлтан Құдайбергеновты еске алуға арналған. Турнир өңірдегі жаңа чемпиондарды анықтауға және жастардың спортқа деген сүйіспеншілігін арттыруға бағытталған. Шараға аудандық «Ақсу жекпе-жек спорт клубының» басшысы Рашид Лапаев, бокстан әлем чемпионы Біржан Жақыпов және әскерилер арасындағы әлем чемпионы Абзал Құттыбек қатысты.
Жарысқа өңірге қарасты аудан, қалалардан барлығы 200-ге жуық жас былғары қолғап шебері қатысқан. Бес күнге созылған бәсекеде боксшылар 20 салмақ дәрежесі бойынша сынға түсті. Нәтижесінде жүлделі 1-орынға түлкібастық команда, 2-орынға арыстық команда, 3-орынға Шымкент қаласынан келген спортшылар ие болды. Жас боксшыларға арнайы сыйлықтар мен Алғыс хаттар табысталды. Бұл турнир – болашақ чемпиондар үшін маңызды алаң ғана емес, спорт арқылы бірлік пен рухты дәріптейтін маңызды шара.
