Сауран ауданы, Ескі Иқан ауылдық округіндегі Жүсіп ата кесенесінде «Сапар» орталығының құрылыс жұмыстары жүргізілуде. Ауыл кәсіпкерлерінің бастамасымен қолға алынған жаңа ғимараттың құрылыс жұмыстарына ауыл тұрғындары да көмектесуде.
Жүсіп ата кесенесіндегі заманауи талаптарға сай салынып жатқан «Сапар» орталығында әкімшілік ғимараты, «Жүсіп ата» тарихы және «Өңір тарихы» музейі, туристтерге арналған арнайы демалыс бөлмелері және жуыну бөлмесі, дәретхана мен су жүйесі де орналасады. Қазіргі таңда ғимараттың құрылысымен қатар орталық маңайын абаттандыру, ағаш егу жұмыстары да аяқталып қалды. Ғимарат аумағында арнайы автотұрақ, жарықшамдар мен қонақтарға арналған демалыс орындары да бар. 2021 жылдың сәуір айында басталған құрылыс жұмыстары бүгінгі күнде аяқталуға жақын.
Жаңа кешеннің құрылысына үлес қосып жатқан ауыл тұрғындарының еңбегін айрықша атап өту керек.
«Ауылымызда салынып жатқан бұл кешен ауылымыздың тарихын дәріптеуде маңызы зор. Осындай тамаша кешен салынып жатқанда біз қол қусырып қарап отырмай, көмегімізді көрсетудеміз. Құрылысы мен қатар қаржысына да ауыл тұрғындары жәрдемдесуде»,- дейді Ескі Иқандықтар.
Қазіргі таңда «Сапар» орталығында кітаптар мен ауыл тарихын көрсететін мәліметтер мен суреттер қоры жиналуда.
Орталықтың жалпы құны 50 миллион теңгені құрайды. Бүгінде Жүсіп ата кесенесін Түркістан өңірінің туристік маршрутына енгізу бағытында жұмыстар жүргізіліп жатыр.
