Сауран ауданы әкімдігінің ішкі саясат бөлімін басқаруға мемлекеттік қызметші Калеке Марат Ержанұлы тағайындалды. Бұл туралы аудан әкімінің баспасөз қызметі хабарлады.
Жаңа басшының кандидатурасы кәсіби тәжірибесі мен ішкі саясат саласындағы ұзақ жылдық еңбегіне байланысты қолдау тапты.
Марат Ержанұлы 1993 жылғы 8 шілдеде Оңтүстік Қазақстан облысы, Түркістан қаласында дүниеге келген. Білімі жоғары, 2015 жылы Қожа Ахмет Ясауи атындағы Халықаралық қазақ-түрік университетін, ал 2017 жылы Аймақтық әлеуметтік-инновациялық университетін тәмамдаған. Мамандығы – мемлекеттік және жергілікті басқару, экономика саласы.
Мемлекеттік қызметке 2016 жылы қабылданып, алғашқы еңбек жолын Түркістан қаласы әкімдігінің ішкі саясат бөлімінде бас маман міндетін атқарушы ретінде бастаған. Кейін осы бөлімде бас маман, жетекші маман, сондай-ақ дін мәселелері және ұлтаралық қатынастар секторының бас маманы қызметтерін атқарды.
2019 – 2021 жылдары Түркістан облысы қоғамдық даму басқармасында мемлекеттік идеологияны және «Рухани жаңғыру» бағдарламасын насихаттау бағытында жұмыс істеді. 2021 жылдан бастап Сауран ауданы әкімдігінің ішкі саясат бөлімінде сектор меңгерушісі қызметін атқарып келді. 2025 жылдың шілде айынан бастап қазіргі уақытқа дейін Ішкі саясат бөлімінің басшысының міндетін уақытша атқарушы болды.
