«Түркістан – түркі әлемінің жүрегі» тақырыбында Сауран ауданының Түркістан қаласындағы мәдени күндері өтуде. «Керуен Сарай» кешенінде өткен мәдени күндердің алғашқы күнінде Сауран көшін ауданның зиялы қауым өкілдері, ауданнан шыққан талантты сазгерлер мен ақындар, ел ағалары бастап келді.
Мәдени шарада көне Сауран қалашығының тарихына қатысты және ауданнан шыққан ақындар мен жазушылардың кітаптары, Ескі Иқан ауылдық округінің тумасы, суретші, дизайнер Санобар Абдураимованың суреттері мен ұлттық нақыштағы киім үлгілері көрмеге қойылды.
Мәдени шараның алғашқы сахнасы Сауран ауданы Бабайқорған ауылының тумасы, Қазақстан Жастар сыйлығының лауреаты, Халықаралық Алаш әдеби сыйлығының лауреаты, Құрмет орденінің иегері, Ұлт қайраткері, Алаш арыстарының ізбасары, Қазақстанның еңбек сіңірген қайраткері, Сауран ауданының құрметті азаматы, ақын Қасымхан Бегмановтың сөзіне жазылған әндерімен ашылды.
Сауран ауданына қарасты Қарашық ауылдық мәдениет үйіндегі өзбек халық театры мен Жүйнек ауылдық мәдениет үйіндегі «Дильшад» ән – би ассамблі өзбек ұлтының дәстүрлі әндерін шырқап, ұлттық нақыштағы биін биледі.
Ән төгілген әсем шарада Сауран ауданының тумасы, Қазақстан Жастар одағы сыйлығының лауреаты, талантты сазгер Сауран Елеуов құттықтау сөз сөйлеп, Мағжан Жұмабаевтың «Түркістан» өлеңіне жазған әні шырқалды.
Қала тұрғындары мен қонақтарына, туристерге керемет көңіл күй сыйлаған концертте әндері халықтың арасына кең тараған, талантты сазгер Бекжігіт Сердәлінің туындыларын көрермендер хормен шырқады.
Сауран ауданы Үлгілі ауылының тумасы,Түркістан қаласының құрметті азаматы, Қазақстан Жастар одағы сыйлығының лауреаты, Қазақстанның мәдениет қайраткері, ХҚТУ – нің профессоры.Сауран ауданының құрметті азаматы, композитор Бекжігіт Сердәлінің құттықтау сөзі мен әсем әндерінен соң Қазақстан Жазушылар Одағының мүшесі, Әлем халықтары жазушылар одағының бас марапаты «Алтын қауырсын» медалінің иегері, ақын Сайлаухан Жоланов Түркістанға арнаған рухты өлеңдерін оқыды. Сонымен қатар Жаңа Иқан ауылының тумасы, компазитор, Ғалымжан Әлтек пен сазгер Алмас Мұхтарұлының әуезді әндері шырқалып, көрермендерге қуаныш сыйлады.
Әсем ән шырқалып, рухты өлеңдер шырқалған кеште қасиетті қобыздың да үні естілді. Жүйнек ауылының тумасы, сазгер, ақын Шерхан Әлібек Мағжан Жұмабаевтың «Батыр Баян» жыры мен Ақтамбердінің толғауын қобызбен орындап, көрермендердің қиялын ерте заманға ертіп кетті. Сауран ауданының мәдени күндерінің алғашқы күні ақын Сейтқали Мадуанидың сөзіне жазылған Бекжігіт Сердәлінің «Түркістаным Тұраным» әнімен аяқталды.
Құрылғанына жыл толған жас ауданның өнерпаздарының Түркістанға тартуы мұнымен біткен жоқ.
Мәдени күндердің екінші күні 19 маусымда кешкі сағат 20:00-де «Керуен Сарай» кешенінде жалғасады.
