Сауран ауданында экономиканы дамыту, ауылдық аумақтардың әлеуетін тиімді пайдалану, инвестиция тарту және экономиканы әртараптандыру бағытындағы жұмыстар жүйелі түрде жүзеге асырылуда. Осы бағыттағы маңызды міндеттердің бірі – әрбір ауылдық округтің өндірістік және кәсіпкерлік мүмкіндіктерін арттырып, тұрғындардың әл-ауқатын жақсартуға бағытталған тұрақты экономикалық негіз қалыптастыру.
Осы мақсатта Сауран ауданының әкімі Мақсат Таңғатаровтың төрағалығымен Иассы ауылдық округі тұрғындарымен есеп беру кездесуі өтті. Жиын барысында ауылдық округтің 2026 жылдың алғашқы төрт айындағы әлеуметтік-экономикалық даму көрсеткіштері сараланып, алдағы кезеңге арналған міндеттер мен жоспарлар талқыланды.
Кездесуде Иассы ауылдық округінің әкімі Сиздик Пирметов округ аумағында атқарылған жұмыстар жөнінде баяндама жасап, ауыл шаруашылығы, кәсіпкерлік, өндіріс, инфрақұрылым және әлеуметтік салалардағы негізгі нәтижелерге тоқталды. Сонымен қатар жер қатынастары, тұрғын үй-коммуналдық шаруашылығы, жұмыспен қамту және әлеуметтік бағдарламалар бағыттары бойынша жауапты бөлім басшылары тұрғындардың сауалдарына жауап беріп, алдағы міндеттерді түсіндірді.
Иассы ауылдық округінің экономикалық дамуында ауыл шаруашылығы саласы маңызды орын алады. Есепті кезеңде бұл бағытта инвестициялық белсенділік артып, негізгі капиталға тартылған инвестиция көлемі 146,8 млн теңгені құрады. Бұл көрсеткіш ауыл шаруашылығы саласына деген қызығушылықтың артып келе жатқанын және өндірістік әлеуетті дамытуға бағытталған жобалардың жүзеге асырылып жатқанын көрсетеді.
Мал шаруашылығы саласында да оң динамика байқалады. Ауылдық округте жаңа қора-жайлар мен қажетті инфрақұрылым нысандарын салу жұмыстары жүргізілуде. Мұндай жобалар мал басын көбейтуге, өндіріс көлемін арттыруға және ауыл тұрғындарының табыс көздерін кеңейтуге мүмкіндік береді. Мал шаруашылығын дамыту арқылы жергілікті экономиканың тұрақтылығын қамтамасыз ету, азық-түлік қауіпсіздігін нығайту және ішкі нарықты сапалы өніммен қамту көзделіп отыр.
Ауыл шаруашылығы өнімдерін өндіру көлемі де тұрақты өсім көрсетуде. Биылғы жылдың бірінші тоқсанында 625 тонна ет және 80 тонна сүт өнімі өндірілді. Бұл көрсеткіштер ауыл шаруашылығы саласындағы еңбек өнімділігінің артып келе жатқанын және жергілікті өндірістің даму қарқынын көрсетеді.
Сауран ауданында экономикалық өзін-өзі қамтамасыз ету бағытында ауыл шаруашылығы өнімдерін өндірумен қатар, оларды өңдеу, сақтау және өткізу жүйесін дамытуға ерекше мән берілуде. Өйткені дайын өнім өндіру көлемін арттыру, шикізатты жергілікті жерде өңдеу және қосылған құны жоғары тауар шығару аудан экономикасының тұрақты дамуына негіз болады.
Иассы ауылдық округінде экономиканы әртараптандыру бағытында өндіріс саласын дамытуға ерекше басымдық берілуде. Кездесу барысында өндірістік жобалардың жүзеге асырылу барысы талқыланды. Еңбекші Дихан ауылындағы 8 гектар аумақта орналасқан өндірістік аймақта бүгінде 22 кәсіпкер құрылыс жұмыстарын жүргізуде. Оның ішінде 7 кәсіпорынның құрылысы толық аяқталған.
Аталған өндірістік аймақта болашақта жиһаз және құрылыс материалдарын өндіретін 24 кәсіпорын жұмыс істейтін болады. Жобалар толық іске қосылған кезде шамамен 600 жаңа жұмыс орны ашылады деп жоспарлануда. Бұл – ауыл тұрғындарын жұмыспен қамтуға, кәсіпкерлікті дамытуға және аудан экономикасының өндірістік бағытын күшейтуге мүмкіндік беретін маңызды бастама.
Өндіріс орындарының ашылуы Сауран ауданының инвестициялық тартымдылығын арттырып, экономиканың жаңа бағыттарын қалыптастырады. Жаңа кәсіпорындар жергілікті шикізатты тиімді пайдалануға, шағын және орта бизнестің дамуына, салық түсімдерінің көбеюіне және аудан бюджетінің мүмкіндіктерін кеңейтуге ықпал етеді.
Сонымен қатар Еңбекші Дихан ауылында Түркістан–Кентау тас жолы бойынан «Дәморда» азық-түлік өндірістік кешенінің құрылысы басталды. Жалпы аумағы 6,3 гектарды құрайтын бұл жоба аясында 18 инвестор өндірістік нысандарын орналастыруды жоспарлап отыр. Қазіргі таңда құрылыс жұмыстары қарқынды жүргізілуде.
Аталған кешеннің іске қосылуы азық-түлік өндірісін дамытуға, жаңа жұмыс орындарын ашуға және өңірдің өндірістік әлеуетін арттыруға мүмкіндік береді. Сонымен қатар бұл жоба аудан экономикасын әртараптандыруға, яғни ауыл шаруашылығымен қатар өндіріс және өңдеу салаларының үлесін арттыруға бағытталған маңызды қадам болып табылады.
Инвестиция тарту – Сауран ауданының экономикалық дамуының негізгі тетіктерінің бірі. Инвесторларға қолайлы жағдай жасау, инфрақұрылымды дамыту және кәсіпкерлік бастамаларды қолдау арқылы жаңа жобаларды жүзеге асыруға мүмкіндік артып келеді. Иассы ауылдық округінде жүзеге асырылып жатқан өндірістік жобалар осы бағыттағы жұмыстардың нақты нәтижесі.
Сонымен қатар инженерлік инфрақұрылымды дамыту жұмыстары да жалғасуда. Ауыз сумен қамтамасыз ету жүйесін жаңғырту тұрғындардың өмір сүру сапасын арттырып қана қоймай, жаңа өндіріс орындарының дамуына қажетті жағдай қалыптастырады. Себебі сапалы инфрақұрылым – экономикалық өсімнің негізгі алғышарттарының бірі.
Кездесу соңында аудан әкімі тұрғындардың ұсыныс-пікірлерін тыңдап, көтерілген мәселелер бойынша жауапты сала басшыларына нақты тапсырмалар берді. Барлық ұсыныстар мен ескертулер хаттамаға енгізіліп, олардың орындалуы тұрақты бақылауда болатыны атап өтілді.
Жалпы, Иассы ауылдық округінде жүзеге асырылып жатқан жұмыстар Сауран ауданындағы экономиканы дамыту, экономикалық өзін-өзі қамтамасыз ету деңгейін арттыру және өндірістік әлеуетті кеңейту бағытындағы кешенді шаралардың бір бөлігі болып табылады. Ауыл шаруашылығы, өндіріс, кәсіпкерлік және инвестициялық жобаларды қатар дамыту арқылы аудан экономикасының тұрақтылығы нығайып, жаңа мүмкіндіктер қалыптасуда.
