Сауран ауданында инвестициялық саясатты жандандыру, өңдеу өнеркәсібін дамыту және халықаралық сауда-экономикалық ынтымақтастықты кеңейту бағытындағы жұмыстар жүйелі түрде жүзеге асырылуда. Мемлекет басшысы айқындаған экономиканы әртараптандыру, отандық өндірісті қолдау және өңірлердің экономикалық әлеуетін күшейту жөніндегі тапсырмалар аясында ауданда ірі инвестициялық жобалар кезең-кезеңімен іске асырылып келеді.
Бүгінде аудан тек ішкі инвесторлар үшін ғана емес, шетелдік компаниялар үшін де тартымды өңірге айналып отыр. Түркия, Қытай және басқа да мемлекеттердің жетекші компаниялары жергілікті кәсіпорындармен бірлесіп өндіріс орындарын ашып, жаңа технологияларды енгізуде. Бұл өз кезегінде өндіріс мәдениетін жаңғыртып, халықаралық стандарттарға сай өнім шығаруға мүмкіндік береді.
Қазақстанның 30 жылдығы елді мекенінде «Euro Sandwich Panel» жауапкершілігі шектеулі серіктестігінің сендвич-панельдер мен металл конструкцияларын шығаратын заманауи зауытының құрылысы басталды. Жалпы инвестиция көлемі 6 миллиард теңгені құрайтын бұл жоба құрылыс индустриясын дамытуға және импортты алмастыратын өнім өндіруге бағытталған. Кәсіпорын іске қосылғаннан кейін ішкі нарықтағы сұранысты қамтамасыз етумен қатар, өнімді көршілес мемлекеттерге экспорттау мүмкіндігі де қарастырылуда.
Халықаралық өндірістік кооперацияның жарқын үлгілерінің бірі – Түркия Республикасының «Occa Chair» компаниясы мен «Сейхун» жауапкершілігі шектеулі серіктестігінің бірлескен жобасы. Жүйнек елді мекенінде түркиялық технология негізінде жиһаз шығаратын өндіріс іске қосылды. Инвестиция көлемі 1 миллиард теңгені құрайтын кәсіпорын заманауи дизайн мен жоғары сапаны ұштастыра отырып, ішкі нарықты бәсекеге қабілетті жиһаз өнімдерімен қамтамасыз етуге бағытталған.
Жасыл энергетика саласында да маңызды жобалар жүзеге асырылуда. Liaoning Energy Technology компаниясы мен «ДиасКом» жауапкершілігі шектеулі серіктестігі бірлесіп күн энергиясымен жұмыс істейтін көше жарықтандыру жүйелерін шығаратын өндіріс орнын салды. Қазіргі уақытта кәсіпорында технологиялық жабдықтарды орнату жұмыстары аяқталуға жақын. Бұл жоба энергия тиімділігін арттырумен қатар, экологиялық таза технологияларды өндіріске енгізуге мүмкіндік береді.
Ескі Иқан елді мекенінде Қытайдың Xinjiang компаниясы мен «Қазақстан мақта» жауапкершілігі шектеулі серіктестігі ауыл шаруашылығы техникаларын шығаратын жаңа өндіріс құруды қолға алды. Жалпы құны 16 миллиард теңгені құрайтын жоба аясында топырақ өңдеу, егін жинау және агротехнологиялық процестерді автоматтандыруға арналған заманауи техникалар өндірілмек. Бұл кәсіпорын ауыл шаруашылығы саласының технологиялық жаңаруына ықпал етіп, импортқа тәуелділікті азайтуға мүмкіндік береді.
Сауран ауданында жаңартылатын энергия көздерін дамытуға да ерекше көңіл бөлінуде. «Sauran Solar Power» компаниясы қуаттылығы 300 мегаватт болатын күн электр станциясының құрылысын бастады. Қазіргі таңда құрылыс алаңында жерді дайындау және инженерлік жұмыстар жүргізілуде. Жалпы инвестиция көлемі 164 миллиард теңгені құрайтын бұл жоба өңірдің энергетикалық қауіпсіздігін күшейтіп, «жасыл экономика» қағидаттарын дамытуға ықпал етеді.
Сонымен қатар «Altyn Dala Energy» компаниясының қуаттылығы 185 мегаватт болатын тағы бір күн электр станциясының құрылысына 400 гектар жер учаскесі белгіленіп, жерге орналастыру жұмыстары жүргізілуде. Инвестиция көлемі 60 миллиард теңгені құрайтын жоба іске асқанда ауданның энергетикалық әлеуеті айтарлықтай артып, баламалы энергия өндірісі кеңейеді.
Жалпы алғанда, кәсіпкерлік пен өндірісті дамыту бағытында аудан бойынша 136 өндірістік ғимаратта 83 инвестициялық жобаны іске асыру жоспарланған. Бұл жобалардың нәтижесінде 2 500-ден астам жаңа тұрақты жұмыс орны ашылып, жергілікті тұрғындардың жұмыспен қамтылу деңгейі артады. Сонымен қатар жаңа өндірістер аудан бюджетіне түсетін салық көлемін көбейтіп, экономикалық өзін-өзі қамтамасыз ету деңгейін көтеруге мүмкіндік береді.
Сауран ауданында инвестиция тарту тек өндіріс орындарын көбейтумен шектелмейді. Негізгі мақсат – халықаралық сауда-экономикалық ынтымақтастықты кеңейту, озық технологияларды тарту және әлемдік тәжірибені жергілікті өндірісте тиімді пайдалану. Түркия, Қытай және басқа да мемлекеттердің компанияларымен жүзеге асырылып жатқан бірлескен жобалар өңірдегі өндіріс мәдениетінің жаңаруына және өнім сапасының халықаралық талаптарға сәйкестенуіне жол ашуда.
Қазақстандық өнімнің сапасын арттыру – ауданның өнеркәсіптік саясатының маңызды басымдықтарының бірі. Кәсіпорындарда халықаралық стандарттарға сай өндіріс технологиялары енгізіліп, өнімнің қауіпсіздігі мен бәсекеге қабілеттілігіне ерекше назар аударылуда. Бұл өз кезегінде ішкі нарықтағы отандық өнімнің үлесін арттырып қана қоймай, экспорттық әлеуетті күшейтуге мүмкіндік береді.
Ұлттық экспорттаушыларды мемлекеттік қолдау тетіктерін тиімді пайдалану арқылы Сауран ауданында өндірілген өнімдерді шетелдік нарықтарға шығару жұмыстары да жандана түсуде. Кәсіпкерлерге өндірісті жаңғырту, сертификаттау, экспорттық рәсімдерді жеңілдету, логистикалық инфрақұрылымды жетілдіру және жаңа өткізу нарықтарын игеру бағытында мемлекеттік қолдау көрсетілуде. Бұл шаралар жергілікті кәсіпорындардың халықаралық бәсекеге қабілеттілігін арттыруға негіз болады.
Ауданның тиімді географиялық орналасуы шекара маңындағы сауданы дамытуға да қолайлы мүмкіндік береді. Логистикалық бағыттарды жетілдіру, қойма инфрақұрылымын дамыту және көршілес мемлекеттермен сауда байланыстарын нығайту арқылы өңірдің транзиттік және экспорттық әлеуеті артып келеді. Бұл ішкі нарықтың тұрақтылығын қамтамасыз етіп қана қоймай, Сауран ауданын халықаралық сауда-экономикалық байланыстардың маңызды орталықтарының біріне айналдыруға мүмкіндік береді.
Жалпы, Сауран ауданында жүзеге асырылып жатқан инвестициялық жобалар өңірдің индустриялық дамуына жаңа серпін беріп отыр. Өндіріс орындарының көбеюі, халықаралық серіктестіктің нығаюы, жаңа технологиялардың енгізілуі және экспортқа бағдарланған кәсіпорындардың қалыптасуы аудан экономикасының бәсекеге қабілеттілігін арттырып, ұзақ мерзімді тұрақты өсімнің берік негізін қалыптастыруда.
