САУРАННЫҢ ӨНЕРПАЗДАРЫ ТҮРКІСТАНДЫ 2 КҮН ӘНГЕ БӨЛЕДІ

212

2 күнге созылған «Түркістан – түркі әлемінің жүрегі» атты Сауран ауданының Түркістан қаласындағы мәдени күндері өз мәресіне жетті. Шараның екінші күні сазгер Шерхан Әлібековтың рухты да ұранды «Бұл шаһар» әнімен басталып, дарынды сазгер Алмас Мұхтарұлының Түркістанға арнаған жаңа туындысы «Кел Түркістанға» әнімен жалғасты.

Жаңарған жаңа Түркістан мен тарихи көне Түркістанның келбеті мен қасиетін жырлап, бар қазақты Түркістанға шақырған әуезді ән көрермендердің көңілін көтерді.

Түркістан төрінде өтіп жатқан Сауран ауданының мәдени күндеріне аудан әкімі Ғани Рысбеков арнайы келіп, құттықтау сөз сөйледі.

«Тарихы көне, келбеті көркем Түркістанымыз күннен күнге құлпырып келеді. Облыстың ең жас ауданы Сауран ауданының зиялы қауымы мен ел ағаларынан, өнерпаздарынан құралған мәдени көш 2 күн бойы Түркістан жұртшылығына керемет көңіл-күй сыйлауда. Дәл бүгін облысымыздың құрылғанына да 4 жыл толуда. Біздің мәдени шарамыздың осы күнге тұспа тұс келгеніне қуаныштымыз.Түркістанымыз көркейіп, дами берсін», – деді Ғани Рысбеков.

Шараның келесі кезеңін «Дильшод» ән-би ансамблінің өнерпаздары әсем әнімен, бұралған биімен жалғады. Аудан әншілері көпшіліктің жүрегінен орын алған ескі әндер мен есті әндерді орындап, шараға жиналған егде жастағы көрермендердің қиялын жастық шаққа жетеледі.

Сауранның сазгерлері Түркістан туралы ән арнап, ақындары жырға бөлеген әсерлі кеште ауданның серілері халық әндерін орындады.

Домбырада күй шертіліп, ән айтылған, жаңа бағыттағы эстрадалық әндер де қамтылған кешкі концерттен әдемі әсер алған қала тұрғындары мен қонақтары өз ризашылығын білдірді.