Шардара су қоймасы мен Көксарай су реттегішінде 6,5 миллиард текше метр су жиналып отыр. Бұл былтырмен салыстырғанда 2,3 миллиардқа көп. Бұл туралы сенатор Бибігүл Жексенбай ҚР Премьер-Министрі Әлихан Смайыловтың атына жолдаған депутаттық сауалында айтты.
Депутат осыған дейін Сенаттың Халықаралық қатынастар, қорғаныс және қауіпсіздік комитеті мемлекеттік органдар және өңірлердегі әкімдіктердің өкілдерімен көктемгі су тасқынына дайындық мәселелері бойынша кездесу өткізгенін еске салды. Кездесу барысында мүмкіндігінше жедел шешілуі тиіс бірқатар мәселелер анықталған.
Сенатордың айтуынша, қазіргі таңда жауапты мемлекеттік органдардың су бұру мәселесін шешудегі әрекеттерінің сәйкессіздігі байқалады. Бұл мәселе бойынша осы уақытқа дейін мекемеаралық жұмыс тобы құрылған жоқ.
Депутат мамандар Шардара су қоймасында секундына 1500 текше метр өткізу қабілеті бар апаттық дренаждық арна салу қажет екенін айтып отырғанына тоқталды. Бұл мәселенің талай көтерілгеніне қарамастан, Үкімет нақты шаралар қолданбаған.
Бибігүл Жексенбайдың пайымынша, еліміздің салалық министрліктері Шардара су қоймасына келетін су мөлшерін азайту мәселелері бойынша Өзбекстанның өкілдерімен келіссөздер жүргізу қажет.
«Су бұру проблемасын шешу тек мемлекетаралық деңгейде мүмкін болғандықтан, оған Қазақстан Республикасы Үкіметінің көмегі қажет», – деді сенатор.
Бұдан бұрын хабарланғандай, биыл ақпан айының аяғында Экология және табиғи ресурстар министрі Зүлфия Сүлейменова Шардара мен Көксарайдың жағдайы бақылауда тұрғанын айтты.
