Қазақстан халқы өз таңдауын жасады және дұрыс жасады деп есептеймін.
Мемлекет басшысының бұған дейінгі жолдаған міндеттері мен жүктеген тапсырмаларының жүзеге асатынына сенімім кәміл. Бүгінде отандық және халықаралық сарапшылардың пікірі де осыған саяды. Өз таңдауын жасаған сайлаушылардың әділетті қоғамға қарай бет бұруы, жастардың саяси-қоғамдық өмірден өз орнын нақтылап, елдің болашақтағы саяси өміріне белсене араласуына мүмкіндік арта түседі.
Өз басым Қазақстан азаматтық дамудың жаңа сатысына шықты, деп ойлаймын. Билік балансын, заңның үстемдігін, адам құқығын, оның игілігі үшін жасалатын жұмыстардың сапасын арттырып, жауапкершілікпен атқаруда, әділетті жүйе құруда қоғам болып жұмылу керек. Себебі, бір адам барлығын бақылап, қадағалауы мүмкін емес.
Ерекше атап өтетін жәйт, Түркістан облысының тұрғындары, жерлестеріміз бұл сайлауда белсенділік танытты. Мемлекетіміздің болашағы осы сайлауға байланысты екеніне сенді. Тұрғындардың 80 пайыздан астамы өз дауысын беріп, Республикада алдыңғы қатардан көріндік. Яғни, Қазақстанның болашағына бей-жай қарамайтындығымызды аңғарттық. Қасым-Жомарт Тоқаев сайлаудың алғашқы, алдын ала нәтижесі жарияланған сәтте халқына ризашылығын білдіріп, жүрекжарды лебізін білдірді.
«Халықтың сенімі – ең құнды нәрсе. Сенімді ақтауымыз керек. Бірігіп, қоғам болып жұмыс істеуміз керек», – деді. Жаңа Қазақстанға басқан қадам құтты, жемісті болсын.
Анарбек ОРМАН,
Түркістан облыстық мәслихатының депутаты, «Су ресурстары–Маркетинг» ЖШС-нің Бас директоры
