Бұл туралы Түркістан облысының әкімі Өмірзақ Шөкеев бүгін Мақтаарал ауданының даму қарқыны, өзекті мәселелері талқыланған жиында айтты.
Облыс басшысы өткен жылдың қорытындысы бойынша көрсеткіштері кеміген медициналық және әлеуметтік салалардағы қиындықтарды шешуге күш салу керектігін жеткізді. Су үнемдеу технологияларын, жылыжайларды көбейтіп, тұрақты жұмыс орындарын арттыру үшін ауыл шаруашылығы саласын дамытып, халықты тартуды тапсырды. Өмірзақ Шөкеев ауданда кейбір индикаторларды орындау бойынша жұмысты күшейтуді міндеттеп, халықпен тығыз байланыста қызмет атқарудың жолын айтты.
– Әр ауылдың әкімі тұрғындардың әлеуметтік жағдайын толық білулері тиіс. Қанша жұмыссыз адам бар екенін анықтап, олармен сөйлесу керек. Бәлкім, істің орайын таппай жүрген шығар. Не керек екенін сұрап, ауыл шаруашылығы техникасын, құрылғысын тауып берген жөн. Ауыл шаруашылығы арқылы мыңдаған адамды жұмыспен қамтуға болады. Әр ауылды жеке қадағалап, жұмыс орнын ашуға күш салыңыз, – деді Ө.Шөкеев.
Мақтаарал ауданының әкімі Бақыт Асановтың айтуынша, 2021 жылы Мақтаарал ауданында жалпы ауыл шаруашылығы өнімінің көлемі 65 млрд. теңгеден асқан. Оның ішінде, өсімдік шаруашылығы өнімі 50 млрд. теңгеден асса, мал шаруашылығы – 14 млрд. теңге. Нәтижесінде, нақты көлем индексі бойынша облыс көлемінде аудан 2 орынға ие болған. Аудан бойынша 93 мың тоннаға жуық мақта жиналып, орташа өнімділік 26,5 центнерді құрады.
