2025 жылдың 28 ақпан күні Филармония ғимаратында 60 жылдан астам тарихы бар Түркістан облыстық Мәдениет басқармасына қарасты Ш. Қалдаяқов атындағы филармония өнер шеберлерінің кезекті «Шәмші дастан» атты ән падишасының өмірден өткен күні аясында еске алу концерті өтті.
Кеште филармония өнер шеберлерінің орындауында Шәмшінің таңдаулы шығармалары шырқалды. Бұрын соңды көпшілік назарына ұсынылмаған Шәмші Қалдаяқовтың өмірі мен шығармашылығына арналған бейне роликтер лэд экран арқылы көрерменге жол тартты.
Кеш шымылдығын дәстүрлі әннің тарланы бірнеше республикалық байқаулардың жүлдегері Руслан Ақынбеков ашты. Өнерпаздарды 23 жылдық тарихы бар «Сүгір» атындағы қазақ ұлт-аспаптар оркестрі, «Алаш» вокалды аспаптар ансамблі сүйемелдеді.
Сонымен қатар, кеште филармония өнер шеберлері өнер көрсетті. Концертке арнайы шақырылған ән падишасының қарындасы Қалдаяқова Райхан апамызға алғыс білдіріп, сый-кәде ұсынылды.
Қазақ музыка өнеріне 300-ден астам туынды олжалаған Шәмші атамыз көзі тірісінде: «Халқым барда менің әндерім тыңдаушысыз қалмақ емес»,- дегендей Филармония залы Шәмші әндерін сағынған халықпен толыққандығы және филармония өнер шеберлерінің концерттік бағдарламасын асыға күтетіндігі өнер ордасы үшін үлкен мәртебе. Қазақ өнерінің өркендеуін, облыс және қала тұрғындарының мәдени-рухани байлығының артуын, Ұлы композитордың әндерінің насихатталуын мақсат тұтатын Ш. Қалдаяқов атындағы облыстық филармония өнер ұжымы өз кезегінде маусым сайын жаңа сарын, жоғары деңгейдегі ауқымды кештерін көрерменге ұсынатын болады.
