Облыс орталығында «Түркістан – Түркі әлемінің жүрегі» атты аудан, қалалардың мәдениет күндері аясында ұйымдастырылған «Шағалалы Шардара шақырады!» атты концерттік бағдарламасы өтті. Шардара ауданының мәдениет күндері негізінен іс-шаралар үш күнге жоспарланған болатын. Жиынға Шардара ауданы әкімі, Шардара ауданы әкімінің орынбасары, Түркістан облыстық мәдениет басқармасы басшысының орынбасары, Облыстық мәдениет және халық шығармашылығы орталығының басшысы және зиялы қауым мен өнерпаздар, қала тұрғындары мен қонақтары қатысты.
Алғашқы күні «Періште пейілді шайыр» атты ақын, ардагер ұстаз Нұрғали Ибрайыммен кездесу кеші, содан соң Түркістан облыстық мәдениет басқармасы мен Облыстық мәдениет және халық шығармашылығы орталығының қолдауымен шығарылған белгілі сазгер Лесбек Амановтың «Қара бауыр қасқалдақ» атты әндер жинағының тұсаукесер рәсімі мен әдеби сазды кеші өтті. Ары қарай түрлі көрмелер ұйымдастырылып, «Шағалалы Шардара шақырады» атты аудан өнерпаздарының концертіне ұласты. Шара аясында «Шардара чемпиондары» атты ауданнан шыққан үздік спортшылардың шеруі өтті. Сонымен қатар, бірқатар мәдениет майталманы аудан әкімінің алғыс хатымен марапатталды.
Бағдарламаның екінші күні «Шежіре – дастан» жыр, терме, күй, дастандары мен «Халық әні – қазынам» атты «Мерей» фольклорлық ансамблінің концерттік бағдарламасы өтті. Ал мәдениет күндердің соңғы күнінде Шардара ауданы диқандарының ауылшаруашылық өнімдерінің жәрмеңкесі өтті. Содан соң «Керуен сарай» туристік кешенінде «Түркістан – түркі әлемнің жүрегі» атты Шардара ауданы көркемөнерпаздарының Гала-концертімен қорытындыланды. Алдағы уақытта 29-31 шілде күндері Сарыағаш ауданының мәдениет күндері өтеді деп жоспарлануда.
