Қазіргі таңда Шымкент қаласында қалыптасқан эпидемиологиялық ахуалға байланысты коронавирус инфекциясының таралуын алдын алу және тұрғындардың денсаулығын сақтау бағытында мақсатты жұмыстар атқарылуда.
Шаһар аумағындағы барлық қоғамдық орындар мен аялдамалар, қоғамдық көліктер тұрақты түрде дезинфекциядан өткізілуде. Атақырылып жатқан жұмыстар қала әкімі Мұрат Әйтеновтің тікелей бақылауына алынған.
«Шымкент дезинфекция» мекемесінің маманы Нұрлан Тасболтаевтың айтуынша, қаладағы автобустарды залалсыздандыру жұмыстарына арнайы 5 бригада жұмылдырылған.
Сала мамандарының мәліметі бойынша мегаполистегі жолаушылар тасымалымен айналысатын қоғамдық көліктер күнделікті залалсыздандырылуда. Күндізгі уақытта қоғамдық көліктің соңғы аялдамасында әр айналым сайын және таңертең және кешкі уақытта автобаза аумағында дезинфекциялау жұмысы тұрақты жүргізілуде.
Сондай-ақ, қоғамдық көлік жүргізушілері мен кондукторлары тарапынан жолаушыларға маскалық режимді сақтау жөнінде түсіндіру шаралары қоса атқарылуда.
Айта кетейік, бүгінде Шымкент қаласы бойынша коронавирус жұқтырғандар 3720-ға жетті. Ал, қауіпті індеттен жазылып шыққандар саны 2137-ні құрап отыр.
