Шымкент зообағында жаңғырту жұмыстары қарқынды түрде жүргізілуде

425
Шымкент зообағын жаңғырту жұмыстары 2023 жылдың соңына дейін толығымен аяқталады. Бұл туралы зообақта өткен баспасөз туры кезінде аталған мекеменің директоры Нұрғазы Бұқарбаев мәлімдеді.
Оның айтуынша, алдағы 2 жылдың ішінде мұнда пілдер, ірі мысық тұқымдастар, маймылдар, мүйізтұмсықтар, ұсақ жыртқыштар, ірі кеміргіштер, кенгру мен эму павильондары және бұғылар, зубр, африкалық буйволдарға арналған вольерлердің құрылысын жүргізу жоспарланған.
—Бүгінде Африка аймағының, жаңа террариумның, көл аймағының және аю мен қасқырларға арналған вольерлердің құрылысы аяқталды. Онда аң-құстар мен жануарларға барынша қолайлы жағдай жасалған. Жаңғырту жұмыстары әлемнің үздік заманауи зообақтарының үлгісімен жүргізіліп жатыр. Тазалық жұмыстары күн сайын жүргізіледі. Ал, әр аптаның сәрсенбісі санитарлық күн ретінде белгіленген. Сол күні барлық вольерлер мен павильондар арнайы сұйықтықтармен дезинфекцияланады, — деді Н.Бұқарбаев.
Айта кетейік, соңғы 6 жылдың ішінде Шымкент зообағында аң-құстардың түрлері 168-ден 290-ға дейін көбейген. Ал, келушілер саны 180 мыңнан 400 мың адамға дейін көбейіп отыр.