Шымкентте 1500 орындық провизорлы орын ашылады

324

Бұл туралы Шымкент қаласының әкімі Мұрат Әйтеновтің төрағалығымен өткен жедел штабтың отырысында айтылды.

Жиында қаланың бас санитарлық дәрігері Әбдіманап Төлебаев жоспарлы залалсыздандыру жұмыстарының орындалуын баяндап, арнайы құрылған мониторингтік топтар жұмысының нәтижесінде дәріханалардағы дәрі-дәрмек бағасының тұрақтала бастағанын айтты. Одан бөлек, айыппұл салудың күшейтілгенін жеткізіп, тұтынушыларға чек бермеген дәріханалардың әкімшілік жауапқа тартылатынын хабарлады.

Жиында қаладағы дәрілік заттар сақтайтын қоймалар мен дәріханаларға шет елдерден ең керекті дәрі-дәрмектер жеткізілгені айтылды. Жауаптылардың хабарлауынша, қаладағы дәріханаларда 11 893 – қызу басатын, 40 845 – антикоагулянт, 90 106 – бактерияға қарсы, 81 175 – вирусқа қарсы және т.б. препараттар бар.

Штаб отырысында М.Әйтенов жан сақтау бөліміндегі ахуалды қалыпқа келтіріп, ондағы бос орындар санын 60 пайызға түсіру керектігін айтты.

Жиында қала әкімінің орынбасары Нұрсадық Ергешбек жақында Шымкентте ашылатын провизорлы орталық туралы баяндады. Орынбасардың айтуынша, бес қабатты 1500 орындық провизорлы орталықтың 1, 2-қабатында – 300, 3, 4, 5-қабатында 1200 орын болады.

Қала әкімі Шымкенттегі эпидемиологиялық жағдайды жақсарту бағытында жоспарлы жұмыстарды барынша күшейтіп, жауаптылар өз салалары бойынша жүйелі жұмыс істеу керектігін ескертті.