Жұмыссыздықпен күрес мәселесі – әлеуметтік саясаттың маңызды бөлігі. Бұл ретте нәтижелі жұмыспен қамтуды және жаппай кәсіпкерлікті дамытудың 2017-2021 жылдарға арналған «Еңбек» мемлекеттік бағдарламасы аясында Шымкентте бірқатар жұмыстар атқарылуда. Атап айтқанда биыл қоғамдық жұмыспен 3000 мыңға жуық адам түрлі мекемелер мен кәсіпорындарға жолданды.
Соның бірі Шымкентте уақытша жұмыспен қамтылған қала тұрғыны – Феруза Әбдірова. Ол 2020 жылы Шымкент қаласындағы «SILKWAY» Халықаралық университетінде «Бастауыш пәні» мамандығы бойынша тәмамдаған. Былтыр жас маман қалалық жұмыспен қамту орталығында жұмыссыз ретінде тіркеліп, «Жастар практикасы» бойынша Д.Менделеев атындағы №15 мектеп-лицейіне жолданған. Бағдарламаның мерзімі аяқталған соң, 2021 жылдың ақпан айында аталған мектеп-лицейге бағдарламаның үшінші бағыты шеңберінде «Қоғамдық көмекші» ретінде уақытша жұмысқа жолданды.
– Оқу бітірген соң өз мамандығым бойынша жұмыс істеудемін. Болашақта білікті ұстаз болсам деймін. Сол себепті қаладағы таңдаулы мектептердің бірінде тәжірибе жинақтаудамын – дейді 23 жасар қала тұрғыны.
Жалпы, аталған уақытша жұмысқа орналасуға алты айдан астам есепте тұрған, жұмысынан айырылған жағдайда әлеуметтік төлем алмайтын жұмыссыздар, жұмысы тоқтап тұруына байланысты жұмыспен қамтамасыз етілмегендердің мүмкіндігі бар.
Айта кетсек қазіргі таңда жоспар артығымен орындалып, уақытша жұмысқа жолдама беру әзірге тоқтатылған. Бұл қоғамдық жұмыс – жұмыскерді кәсіптік даярлауға талап етпейді және әлеуметтік бағытқа ие.
