Шымкент қаласында биыл 29,3 мың гектар жерге ауыл шаруашылық дақылдары егілді. Бұл туралы қалалық Ауыл шаруашылығы және ветеринария басқармасының басшысы Асқар Сәкенұлы алты айлық есепті жиынында мәлім етті.
Басқарма басшысының сөзінше, дәнді дақыл 12,9 мың гектарға, майлы дақыл 3,8 мың гектар, мал азығы 8,9 мың гектар, көкөніс пен бақша 3 мың гектар және картоп 0,7 мың гектарға егілген.
Нәтижесінде, 11,2 мың тонна дәнді дақыл, 0,8 мың тонна майлы дақыл, 33,2 мың тонна көкөніс, 3,1 мың тонна картоп және 12 мың тонна мал азықтық дақыл, яғни, барлығы 60,3 мың тонна ауыл шаруашылығы дақылдары жиналды.
Айта кетейік, қалада заманауи өнеркәсіптік жылыжай кешені мен «Бозарық» тамақ өнеркәсібі индустриалды аймағы бар. Өз кезегінде қала әкімі Мұрат Әйтенов нарықта бәсекеге қабілетті және экспортқа бағытталған өнімдер өндірісін ұлғайту қажет екенін тілге тиек етіп, бұл бағыттағы жұмысты жандандыруда үшінші мегаполисте құрылып жатқан екі бірдей агро-индустриалды аймақты пайдалануды айтты.
