Шымкентте егістік көлемі 1000 гектарға артты. Бұл туралы аппараттық мәжіліс барысында ауыл шаруашылығы және ветеринария басқармасының басшысы А.Қаныбеков мәлімдеді,-деп хабарлайды Шымкент қаласы әкімінің баспасөз қызметі.
Шымкент қаласының ауыл шаруашылығы және ветеринария басқармасы басшысы А. Қаныбековтың айтуынша, биыл ауыл шаруашылығы дақылдарының егіс көлемі 27,6 мың гектарға жеткен. Бұл өткен 2019 жылмен салыстырғанда 1000 гектарға көп.
Сонымен қатар көктемгі дала жұмыстарына 1,25 мың тонна жанар – жағармай бөлінгенін айтып өтті. Оның бағасы 174 – теңгеден 160 – теңгеге төмендеген.
Ал минералды тыңайтқыштардың құнын субсидиялау бағдарламасына сәйкес 105,1 млн.теңге қаржы қаралып, бүгінгі таңда 1 мың тонна тыңайтқыштар 50,3 млн.теңгеге субсидияланды.
Ауыл шаруашылығы бағытындағы жерлерді тиімді пайдалану мәселесіне баса назар аударған қала басшысы Мұрат Әйтенов басқарма басшысына құжаттары жоқ егістік жерлер мен сегментацияланған егістік алқаптарды заңдастыру жұмыстарын қадағалауға алуды, игерілмеген егістік жерлер бойынша тиісті жұмыстарды атқаруды тапсырды.
