Шымкент қаласының әкімі Мұрат Әйтеновтің төрағалығымен эпидемиологиялық ахуалға байланысты құрылған жедел штабтың отырысы өтті. Бұл туралы Ақпараттық-коммуникация орталығы хабар таратты.
Отырыста әр салаға жауапты штаб мүшелері қала басшысына өздері жетекшілік ететін бағыттарда атқарылып жатқан жұмыстар жайын жан-жақты баяндады.
Жиында қалалық денсаулық сақтау басқармасының басшысы Рустам Албаев пен жедел медициналық жәрдем көрсету стансасы бас дәрігерінің орынбасары Шолпан Оспанова қысқаша хабарлама жасады. Басқарма басшысы індетке байланысты тіркелген статистикалық деректер мен жүргізіліп жатқан емдеу жұмыстары жайлы айтса, Ш.Оспанова жедел жәрдем қызметі бойынша жағдайдың қалыпқа келе бастағанын жеткізді.
Қала басшысы тиісті мамандарға тәулігіне 30 мың шақырту қабылдайтын диспетчерлік орталықтың ертерек ашылуын ұтымды үйлестіруді жүктеді.
Сондай-ақ, жауаптылар жиналған жиында қаладағы 323 өкпені жасанды желдету аппаратын (ИВЛ) алдағы уақытта 475-ке жеткізу межеленіп отырғаны айтылды.
– Науқастар мемлекеттік күндізгі стационарларда емнің тегін екенін білуі керек. Егер медицина қызметкері ем үшін дәрі-дәрмек сұраса, «109» нөміріне хабарласып, құқықтарын қорғауға мүмкіндіктері бар, деді М.Дүйсенбекұлы.
Штаб отырысында қала әкімі бүгінгі отырыста берілген тапсырмалардың сапалы орындалуы өзінің жеке бақылауында болатынын жеткізді.
