Шымкент қаласында инвестор көмегімен ашылған стационарда алғашқы он күнде 344 науқас жатқызылып, олардың 200-ге жуығы емделіп шықты.
Шымкент қаласында инвестор көмегімен ашылған стационарда алғашқы он күнде 344 науқас жатқызылып, олардың екі жүзге жуығы қажетті ем-дом қабылдап, сауығып шықты. Бүгінде 400 төсек-орындық провизорлық емдеу орны күшейтілген режимде ЖРВИ-мен (жедел респираторлы вирустық инфекция) және пневмониямен ауырған науқастарды емдеу шараларымен айналысуда. Бұл туралы Шымкент қаласының Ақпараттық-коммуникация орталығы хабар таратты.
Барлық санитарлық нормаларды сақтап, жұмыс істеп отырған орталықта 21 дәрігер мен 70 орта буын медицина маманы бар. Мұндағы жағдайы ауыр науқастарға 34 оттегі баллонын қолдануға мүмкіндік қарастырылған. Сондай-ақ, стационар қажетті дәрі-дәрмекпен қамтылып, науқастарға 3 мезгіл ыстық тамақ беру жолға қойылған.
Айта кетейік, бүгінгі таңда Шымкент қаласында коронавируспен ауырған науқастарға арналған 650 төсек-орын мен 26 нысаннан 3110 төсек-орындық провизорлық стационар ашылған. Ал жағдайы ауыр науқастарға 136 жансақтау орны жасақталған.
