Мобильді топ күнделікті кәсіпкерлік нысандарға рейд жүргізуде. Топ — әкімдіктің, жергілікті полиция және аудандық тауарлар мен көрсетілетін қызметтердің сапасы мен қауіпсіздігін бақылау басқармасы өкілдерінен құрылған.
Түсіндірме жұмыстары мен бақылау нәтижесінде карантин режимін бұзушылар саны күн санап төмендеуде.
Қаладағы кәсіпкерлік нысандардың 99 пайызы карантин режимінде көрсетілген шекті уақыттарда өз жұмыстарын аяқтауда.
Соңғы үш күнде қала бойынша карантин талабына бағынбай кешкі мезгілде жұмыс істеп жатқан 50-ге жуық мекемеге хаттама толтырылған. Тауарлар мен көрсетілетін қызметтердің сапасы мен қауіпсіздігін бақылау басқармасымен 2 мыңдай мекемеге ескерту берілген (ара қашықтық сақтау, антисептик пайдалану).
Еске сала кетейік, халық арасында коронавирустық инфекцияның таралуын алдын алу мақсатында Шымкент қаласы бас санитариялық дәрігерінің қаулысына өзгерістер енгізілген болатын. Онда жеке тұрған азық-түлік дүкендерінің жұмыс уақыты сағат 10:00-ден 21:00-ге дейін,демалыс күндері сағат 10:00-ден 18:00-ге дейін шектелді. Қоғамдық тамақтану орындары болса 09:00-ден 21:00-ге дейін жұмыс істейді. Дегенмен демалыс күндері кәсіпкерлік нысандар жұмыстарын уақытша тоқтата тұруларына тура келеді.
Айта өтсек, аталған жұмыстар қала әкімі М.Әйтеновтің қатаң бақылауында.
