ШЫМКЕНТТЕ ЖЕКЕ ИНВЕСТОРЛАР ЕСЕБІНЕН 178 ТҰРҒЫН ҮЙДІҢ ҚҰРЫЛЫСЫ ЖҮРГІЗІЛУДЕ

107

Қазіргі таңда Шымкентте жеке салушылар есебінен 8 639 пәтерлі 178, бюджет есебінен 5 912 пәтерлі 97 көпқабатты тұрғын үйдің құрылысы жүргізілуде.

Бұл ретте бүгінде Шымкент сити шағын ауданында көп қабатты тұрғын үйлердің құрылыс жұмыстары қарқынды жүріп жатыр. Атап айтқанда, шағын аудандағы 4-орамда кеңсе орын-жайлары мен жерасты паркингі бар, тоғыз қабатты 3 тұрғын үйден тұратын «Shymkent Green City» тұрғын үй кешені салынып жатыр. Тапсырыс беруші “Shymkent” ӘКК” АҚ. Серіктес мекеме — «Элит Строй и Company» ЖШС-ы. Үйлердің жалпы ауданы 29 765 шаршы метр. 1,2,3,4 бөлмелі пәтерлер бар. Аумағы 39-116 шаршы метр аралығында болмақ. Жыл соңына дейін құрылыс жұмыстары аяқталып, кредиттік 364 пәтер кілті пайдалануға берілмек.

Сондай-ақ Шымкент сити шағынауданында «Дамдес отау» тұрғын үй кешені бой көтеруде. Мұнда он қабатты №1,6,7,8,9,10 тұрғын үй салынуда. Үйлерге тапсырыс беруші – “Shymkent” ӘКК”. 1,2,3 бөлмелі 420 пәтер бар. Ауданы 49-84 шаршы метр аралығында. Жалпы 29 622 шаршы метрді құрайтын 6 тұрғын үй жылдың соңына дейін пайдалануға беріледі деп жоспарланған.Бүгінде қалада жалпы саны 44 850 азамат тұрғын үй алу тізімінде кезекте тұр.

Шымкентте құрылыс саласында негізгі басымдық көпқабатты тұрғын үйлер құрылысына беріліп отыр. Құрылыс «Нұрлы жер» бағдарламасы аясында жүргізілуде. Қазіргі таңда тұрғын үй құрылысы Тұран шағын ауданы мен Әкімшілік-іскерлік орталығында атқарылып жатыр. Онда биыл 61 тұрғын үйдің (3848 пәтер) құрылысы жүргізіледі (49 үй кредиттік, 12 үй арендалық). Қалған 32 үйдің құрылысы 2022 жылға өтпелі. Ал Әкімшілік-іскерлік орталығында 6 арендалық үйдің (336 пәтер) құрылыс жұмыстары жүргізілуде. Биыл толық пайдалануға тапсырылады.

Сонымен қатар, 8 коммуналдық тұрғын үйдің (432 пәтер) конкурсы аяқталып, мердігері анықталып, оның құрылысына дайындық жұмыстары басталып кетті. Сондай-ақ, Арғынбеков көшесіндегі 4 кредиттік тұрғын үйдің (216 пәтер) құрылысы жалғасып жатыр. Пайдалануға тапсыру мерзімі тамыз-қараша айларына жоспарланған.

Айта кетейік, Шымкентте 3 жыл бұрын 402,5 мың шаршы метр тұрғын үй берілсе, биыл бір миллионға жеткізу жоспарланып отыр.