Шымкент қаласы энергетика және коммуналдық шаруашылық басқармасындағы жауапты мамандардың айтуынша, еліміздегі мегаполистер санатына кіретін Шымкент қаласының 92,1% табиғи газбен қамтылған,-деп хабарлайды dedi.kz Ақпараттық агенттігі.
Биылғы қазан айында Шымкент қаласына келетін көгілдір отынды қабылдап, тарататын №3 автоматты газ-реттегіш стансасының (№3 АГРС) құрылысы аяқталып, пайдалануға берілмек. Жаңа станса сағатына 250 мың куб газ таратуға қауқарлы.
Жоба нәтижелі іске асқанда соңғы жылдары Шымкент қаласы аумағына қосылған барлық тұрғын алаптар мен шағынаудандар табиғи газбен қамтылмақ.
Заманауи жаңа станса миллионды мегаполисті толықтай газбен қамтитын болады. Мердігер компания өкілдері мұндағы құбырлар су өткізбейтін және тез шірімейтін материалдармен қапталады, деп елу жылға кепілдік беріп отыр.
Қалалық энергетика және коммуналдық шаруашылық басқармасы басшысының орынбасары Нұрлан Жаманкөздің айтуынша, №3 АГРС құрылысы аяқталса, Шымкенттегі шағынаудандар мен жүздеген өндіріс орындары отандық көгілдір отынмен қамтылады.
Айта кетейік, №3 АГРС жоспар бойынша келер жылы пайдалануға тапсыру жоспарланған. Алайда, қала әкімі М.Әйтеновтің пәрменімен нысан құрылысы биылығы жылы аяқталып, ел игілігіне сай жұмыс істейтін болады.
